ԵՐԵՎԱՆ, 28 ՀՈԻՆԻՍԻ, ԱՐՄԵՆՊՐԵՍ: «Ալագյազ» զորափորձարանում ռուսական ռազմակայանի տանկային անձնակազմերի նոր ժամանած զինծառայողները Տ-72Բ տանկերով հրաձգության են ձեռնամուխ եղել՝ «տանկային կարուսել» հատուկ մարտավարական մեթոդիկայի օգտագործմամբ:

Ինչպես «Արմենպրես»-ին տեղեկացրեցին ՌԴ Հարավային ռազմական օկրուգի մամուլի ծառայությունից, զորափորձարանում տանկիստները հրաձգություն են իրականացնում պայմանական հակառակորդի ծանր տեխնիկան նմանակող թիրախների վրա դինամիկորեն փոխվող տակտիկական եւ թիրախային իրավիճակում: Վարժության պայմանների համաձայն, առաջին անձնակազմը տեղից անընդմեջ կրակ Է բացում տանկից, երկրորդ եւ երրորդ անձնակազմերը համալրում են մարտական կոմպլեկտը:

Փոխարինելով մեկը մյուսին՝ տանկային անձնակազմերն անընդմեջ հրաձգություն են իրականացնում մինչեւ պայմանական հակառակորդի բոլոր թիրախների լիակատար ոչնչացումը: Նոր ձեւավորված տանկային անձնակազմերի պարապմունքներում գործի են դրված հարյուրից ավելի զինծառայողներ եւ 30 միավոր ռազմական տեխնիկա: