ԱԻՆ-ը շարունակում է 14-ամյա երեխայի որոնողական աշխատանքները Այնթապ- Սովետաշեն տանող տարածքում
ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ:ՀՀ արտակարգ իրավիճակների նախարարությունը հայտնում է, որ հունիսի 18-ին, ժամը 12:30-ի դրությամբ 14-ամյա Հայկ Հարությունյանի որոնողական աշխատանքները վերսկսվել են: Փրկարարները որոնողական աշխատանքներ են իրականացնում Այնթապ-Սովետաշեն տանող տարածքում:
Ինչպես «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, աուտիզմ ունեցող տղայի որոնողական աշխատանքներում ներգրավված են Արարատի մարզի Մասիս քաղաքի հրշեջ-փրկարարական ջոկատից մեկ մարտական հաշվարկ, ոստիկանության աշխատակիցներ և կամավորներ:
ՀՀ ԱԻՆ ՓԾ ճգնաժամային կառավարման ազգային կենտրոնի «911» ծառայություն հունիսի 9-ին, ժամը 21:32-ին ահազանգ էր ստացվել, որ ս/թ հունիսի 8-ին, ժամը 17։00-ի սահմաններում ՀՀ Արարատի մարզի Այնթապ գյուղի բնակիչ, 2004թ. ծնված Հայկ Հարությունյանը դուրս է եկել տանից և չի վերադարձել: Ստացված տեղեկություններով՝ երեխայի հագին եղել է կանաչ վերնաշապիկ և կիսավարտիք:
Բոլոր նրանց, ովքեր որևէ տեղեկություն ունեն Հայկ Հարությունյանի գտնվելու վայրի վերաբերյալ, խնդրում ենք կապվել ոստիկանության կամ արտակարգ իրավիճակների նախարարության հետ՝ զանգահարելով 911 հեռախոսահամարով:
Բաժանորդագրվեք մեր ալիքին Telegram-ում