ՀՀ մարզերը նախապատրաստվում են Մայիսյան հերոսամարտերի 100-ամյակի միջոցառումներին
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: ՀՀ տարածքային կառավարման և զարգացման նախարարի տեղակալ Կարեն Իսախանյանը նախարար Սուրեն Պապիկյանի հանձնարարականով մայիսի 15-16-ը աշխատանքային այցելություններ է իրականացրել Արագածոտնի, Արմավիրի և Լոռու մարզի մի շարք համայնքներ:
Ինչպես «Արմենպրես»-ին տեղեկացրին ՀՀ տարածքային կառավարման և զարգացման նախարարության հասարակայնության հետ կապերի բաժնից, այցելության ժամանակ Հայաստանի Հանրապետության և Մայիսյան հերոսամարտերի 100-ամյակի միջոցառումների կազմակերպման ընթացքին վերաբերող խորհրդակցություններ են անցկացվել փոխմարզպետների և մարզպետարանների ներկայացուցիչների հետ: Քննարկվել են մարզերում նախատեսված միջոցառումների ժամանակացույցը, նախապատրաստական աշխատանքների ընթացքը, առկա խնդիրները և դրանց լուծման ուղղությունները:
ՀՀ տարածքային կառավարման և զարգացման նախարարի տեղակալին զեկուցվել է, որ նախարարի հանձնարարականին համապատասխան, մարզպետների մշտական հսկողության տակ են մարզային (տեղական) նշանակության ավտոմոբիլային ճանապարհների, ինչպես նաև միջոցառման իրականացման վայրերի աղբահանության և բարեկարգման աշխատանքները:
Բաժանորդագրվեք մեր ալիքին Telegram-ում