#ԿինոՇաբթի. Հայկական կինովարձույթում այս շաբաթ կհայտնվի 4 նոր ֆիլմ
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Հինգշաբթին #ԿինոՇաբթի է: «Արմենպրես» լրատվական գործակալությունը շարունակում է ամեն հինգշաբթի ընթերցողի ուշադրությանը ներկայացնել շաբաթվա կինոպրեմիերաները: Այս անգամ ձեզ ենք ներկայացնում այն չորս ֆիլմերը, որոնք ապրիլի 19-ից հնարավոր է դիտել Երևանի կինոթատրոններում:
«Վտանգավոր բիզնես»
Սեքսուալ շիկահերը ստեղծված է վտանգավոր բիզնեսի համար: Մի օր նրա աշխատակիցներից մեկը բացահայտում է այն բանաձևը, որի հետևից ընկած է ամբողջ աշխարհը: Տղամարդը խորամանկորեն կազմակերպում է սեփական առևանգումը և փրկագին պահանջում ընկերությունից: Սակայն նա դեռ չգիտի, որ իր ընկերության համար նա գերադասելի է մահացած, քան ողջ:
Ռեժիսոր` Նեշ Էդգարթոն, Դերերում` Ջոել Էդգարթոն, Շարլիզ Թերոն, Էնթոնի Թամբակիս և այլք:
«Մարզիչը»
Ազգային հավաքականի ֆուտբոլիստ Յուրի Ստոլեշնիկովը ամենապատասխանատու պահին չի իրացնում 11 մետրանոց հարվածը։ Տհաճ սխալից հետո Ստոլեշնիկովը լքում է հավաքականը, ավարտում կարիերան և դառնում փոքրիկ գավառական թիմի մարզիչ։ Հենց այս ակումբի հետ Ստոլեշնիկովը կանի անհնարինը և նորից կհավատա ինքն իրեն։
Ռեժիսոր` Դանիլա Կոզլովսկի, դերերում՝ Դանիլա Կոզլովսկի, Իրինա Գորվաչևա, Անդրեյ Սմոլյակով և այլք:
«Տաքսի 5»
Նախկին կոմիսար Ժիբերը դարձել է Մարսել քաղաքի ամենաանհաջողակ քաղաքապետը: Նա հանձնարարում է նորեկ Սիլվան Մարոյին ձերբակալել քաղաքում շրջող «իտալական ավազակախմբին»: Մարոն ստիպված է համախմբվել Դանիելի զարմիկի հետ, ով ժառանգել է հորեղբոր մեքենան:
Ռեժիսոր՝ Ֆրանկ Գաստամբիդ, դերերում՝ Սալվատոր Էսպոզիտո, Ֆրանկ Գաստամբիդ, Սաբրինա Ուազանի և այլք:
«Անդարձելիության կետը»
Որոշ սահմաններ հատելուց հետո անհնար է մնալ նույն մարդը: Կնոջ և դստեր մահից հետո պրոֆեսորը կորցնում է հետաքրքրությունը կյանքի և աշխատանքի հանդեպ, սակայն նրա ընկերը որոշում է ամեն գնով օգնել պրոֆեսորին դուրս գալ այդ վիճակից:
Ռեժիսոր՝ Բրեդ Անդերսոն, դերերում՝ Ռոզամունդ Փայք, Ջոն Հեմ, Դին Նորիս և այլք:
Տեղեկացնենք, որ #ԿինոՇաբթի նախագիծը պատրաստվել է «Մոսկվա», «Սինեմա Սթար», «Կինոպարկ» կինոթատրոնների տրամադրած տվյալներով:
Նախագծի հեղինակ՝ Ռոզա Գրիգորյան
Բաժանորդագրվեք մեր ալիքին Telegram-ում