ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: ՀՀ  արտակարգ իրավիճակների նախարար Դավիթ Տոնոյանը, Քաղաքացիական պաշտպանության միջազգային կազմակերպության (ՔՊՄԿ, ICDO) գլխավոր քարտուղար Վլադիմիր Կուվշինովի հրավերով, մեկնել է Քաթարի մայրաքաղաք Դոհա՝ մասնակցելու մարտի 27-28-ն այնտեղ անցկացվող Քաղաքացիական պաշտպանության միջազգային կազմակերպության  Գլխավոր Ասամբլեայի 23-րդ նստաշրջանին: Այս մասին «Արմենպրես»-ին տեղեկացրին ՀՀ արտակարգ իրավիճակների նախարարությունից:

Միջոցառումն անցկացվում է Քաթարի վարչապետ և ներքին գործերի նախարար Ն.Գ. Շեյխ Աբդուլահ բին Նասեր բին Խալիֆա Ալ Թանիի հովանու ներքո:

ՔՊՄԿ Գլխավոր Ասամբլեայի նստաշրջանին մասնակցում են 21 երկրի արտակարգ իրավիճակների և քաղաքացիական պաշտպանության պատասխանատու կառույցների բարձրաստիճան պաշտոնյաներ:

Հանդիպման նպատակն է ամփոփել կազմակերպության կողմից իրականացված աշխատանքները, քննարկել ոլորտում առկա խնդիրները և նախանշել առաջիկա տարիների անելիքները: ՔՊՄԿ անդամ երկրների համար սա քաղաքացիական պաշտպանության մեխանիզմը կատարելագործելու վերաբերյալ գաղափարներ և օգտակար փորձ  փոխանակելու հարթակ է:  

Եռօրյա միջոցառման շրջանակում տեղի արագ արձագանքման ուժերի ներգրավմամբ կանցկացվի նաև ցուցադրական դաշտային վարժանք: 

Հայաստանը Քաղաքացիական պաշտպանության միջազգային կազմակերպությանն անդամակցում է 1994 թվականից, և ՀՀ ԱԻ  նախարարությունը տարբեր ձևաչափերով համագործակցում է կազմակերպության հետ: