ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում ձևավորվել է մասնագիտական խումբ, որի նպատակն է ստեղծել առաջին հայկական արևային մեքենան: «Արմենպրես»-ի փոխանցմամբ` նախաձեռնության հեղինակը ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանն է: Նոյեմբերի 24-ին Հայաստանի վերականգնվող էներգետիկայի և էներգախնայողության հիմնադրամում տեղի է ունեցել էլեկտրական շարժիչով աշխատող արևային հայկական մեքենայի ստեղծման թիմի առաջին հանդիպումը, որը վարել է փոխնախարարը: Քննարկման ժամանակ հայտարարվել է գաղափարի գործնական քայլերի մեկնարկի մասին:

«Ֆեյսբուք» սոցիալական ցանցում բացվել է էջ, որտեղ նախատեսվում է ծավալել քննարկումներ, բաց տեղեկատվություն ապահովել հանրության և շահագրգիռ կողմերի համար Հայաստանի վերականգնվող էներգետիկայի և էներգախնայողության հիմնադրամի (r2e2.am) կոորդինացիայի ներքո:
Արևային մեքենա ստեղծելու գաղափարի մասին նոյեմբերի 16-ին իր ֆեյսբուքյան էջում գրառում էր կատարել փոխնախարար Հայկ Հարությունյանը. «Ուզում եմ թիմ հավաքել, որ առաջին հայկական արևային մեքենան ստեղծենք ու մասնակցենք միջազգային մրցարշավներին։ Ով գտնում է, որ այս գործում կարող է դրական ներդրում ունենալ, արձագանքեք։ Արևային մեքենաների մասին ավելի մանրամասն կարող եք ծանոթանալ հետևյալ հղումով»: