Ջրարբիի դպրոցը կջեռուցվի ու կվերանորոգվի
ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Արմավիրի մարզի Ջրարբի գյուղի դպրոցը գարնանը կվերանորոգվի: Առաջիկա տասը օրում դպրոցում ջեռուցման համակարգ կանցկացվի:
«Արմենպրես»-ի հետ զրույցում այս մասին ասաց Արմավիրի մարզպետարանի աշխատակազմի կրթության, մշակույթի և սպորտի վարչության պետ Գայանե Սայադյանը:
Անդրադառնալով նոյեմբերի 20-ին ջեռուցման խնդիրների հետ կապված դպրոցում անցկացված դասադուլին, Սայադյանն ասաց, որ դասադուլին մասնակցել է աշակերտների 60 տոկոսը: «Դասադուլն արդեն դադարեցված է, դասապրոցեսն անցել է բնականոն հունով»,-ասաց նա:
ՀՀ կրթության եւ գիտության նախարարությունից տեղեկացրին, որ հանրապետության դպրոցներում ջեռուցման սեզոնի հետ կապված հստակ ժամկետ սահմանված չէ: Կրթական հաստատություններն անցնում են ջեռուցման սեզոնի` կախված բնակլիմայական պայմաններից: «Ջերմաստիճանը դասասենյակներում պետք է լինի 18 աստիճան»,-տեղեկացրին նախարարությունից:
Բաժանորդագրվեք մեր ալիքին Telegram-ում