ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Լոնդոնի Տրանսպորտային վարչությունն (TfL) սկսած նոյեմբերի 20-ից քաղաքային ավտոբուսների մի մասը կփոխադրի կենսադիզելային վառելիքի, որը պատրաստված Է գործածված սուրճից, տեղեկացնում Է «Արմենպրես»-ը՝ հղում անելով BBC-ին:

Մեծ Բրիտանիայի իշխանություններն ավելի ու ավելի հաճախ են կենսավառելիք օգտագործում՝ օդի աղտոտվածությունը նվազեցնելու համար: Սակայն առաջին անգամ Է, որ Լոնդոնը սուրճի մնացուկների համար կիրառություն կգտնի տրանսպորտում, որոնք մայրաքաղաքն արտադրում Է առատությամբ:

Մեծ Բրիտանիայի Bio-bean ստարտապը, որն ստեղծել Է ձեռնարկիչ Արթուր Լեյը, արդյունաբերական եղանակով վերամշակում Է սուրճի մրուրը եւ իր արտադրանքը վաճառում Մեծ Բրիտանիայի այն ընկերություններին, որոնք այն օգտագործում են շենքերի ջեռուցման, ինչպես նաեւ որպես վառելիք ավտոմոբիլների համար: Bio-bean-ի տվյալներով՝ լոնդոնցիները տարեկան 200 հազար տոննա՝ սուրճի մնացուկներ են թողնում, ըստ որում սուրճի մնացուկների յուրաքանչյուր տոննան թույլ Է տալիս ածխաթթվական գազի արտանետումները կրճատել 6,8 տոնայով:

Լոնդոնի մեկ ավտոբուսը վառելիքով ապահովելու համար մայրաքաղաքի բնակիչները եւ հյուրերը պետք Է տարեկան խմեն 2,55 միլիոն գավաթ սուրճ: Bio-bean-ում Է աշխատում Մեծ Բրիտանիայի խոշորագույն հողատեր եւ երկրի ամենահարուստ մարդկանցից մեկը՝ Վեսթմինսթերի դուքս Հյու Ռիչարդ Լուիս Գրոսվենորը, հաղորդել Է «Ինտերֆաքս»-ը: