ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: ՀՀ ԱԺ պատգամավոր Ռուզաննա Մուրադյանը Ազգային ժողովում Կառավարության հետ հարցուպատասխանի ժամանակ անդրադարձավ վերջերս մամուլում շրջանառված լուրերին այն մասին, թե Երեւանի Ջոն Կիրակոսյանի թիվ  20 դպրոցում առաջին դասարանի աշակերտի նկատմամբ գրանցվել է ոտնձգության դեպք, մասնավորապես՝ նախնական լուրերի համաձայն՝ երեխային կապել էին եւ կտրել նրա թարթիչները:

Պատգամավորն իր մտահոգությունը հայտնեց այս հարցի վերաբերյալ եւ Կրթության ու գիտության նախարար Լեւոն Մկրտչյանին հարցրեց՝ արդյոք կան մեխանիզմներ, որոնցով հնարավոր է պաշտպանել դպրոցի համբավը նախքան համապատասխան մարմինների կողմից դեռեւս չբացահայտված նման դեպքերի պարագայում:

«Չգիտեմ՝ բացահայտումը այժմ որ փուլում է, բայց նախնական փուլում, երբ դեռեւս բացահայտված չէր, մեծ աղմուկ բարձրացավ»,-«Արմենպրես»-ի հաղորդմամբ՝ ասաց պատգամավորը՝ հիշեցնելով, որ սա ներառական դպրոց է:

ԿԳ նախարարը հորդորեց նման դեպքերը հրապարակելուց առաջ պատշաճ կերպով ճշտել՝ արդյոք դա համապատասխանում է իրականությանը, հատկապես որ խոսքը ընդամենը առաջին դասարանի երեխայի մասին էր:

«Խնդիրը կարճ ժամանակ հետո պարզվեց, տնօրենը, մասնավորապես, պարզաբանեց, որ, ըստ էության, այդպիսի խնդիր չկար,  մի փոքր այլ հոգեվիճակի երեխա էր, հակասությունը ընտանիքի ներսում էր, հենց մայրն  էլ խնդիրը կարգավորեց: Խնդիրն այն է, որ մենք  ուշադիր նայում ենք՝ ինչ երեւույթ կա, որ կարելի է հրապարակ հանել առանց ճշտելու, չպետք է մոռանալ, որ խոսում ենք երեխաների, ընտանիքի, ուսուցչի մասին:  Կես ժամվա մեջ պարզվեց, որ դա չի համապատասխանում իրականությանը, բայց արդեն տնօրենը ստիպված  սկսել էր արդարանալ, ծնողներն ամեն  տեղ պատմում էին, որ չկա այդպիսի բան: Ներառական ասելով՝ չպետք է միայն հասկանալ հաշմանդամություն ունեցող երեխաների  ներառման  խնդիրը, դա հասարակության տրամաբանությունն է, իսկ մեր հասարակության մոտ դա պակասում է: Դա նախեւառաջ հանդուրժողականությունն է,  մեկը մյուսի դժվարությամբ մտահոգվելու կարողությունը»,-եզրափակեց նախարարը: