Լոռու մարզում նվազել են անչափահասների կողմից կատարված հանցագործությունների դեպքերը
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Լոռու դատախազության ուշադրության կենտրոնում են անչափահասների կողմից կատարված հանցագործությունների դեպքերը: «Արմենպրես»-ի հաղորդմամբ` այս մասին նոյեմբերի 2-ին ասուլիսում նշեց Լոռու մարզի դատախազ Արսեն Մարտիրոսյանը: Նրա խոսքով` աշխատանքներ են տարվում անչափահասների կողմից կատարված հանցագործությունները բացառելու ուղղությամբ:
«Լոռու մարզի դատախազության կողմից կատարվել է առանձին ուսումնասիրություն և արձանագրվել , որ այս տարի նախորդ տարվա համեմատ անչափահասների հանցագործությունների թիվը նվազել է: Եթե 2017 թվականի 9 ամիսների ընթացքում մարզի տարածքում արձանագրվել է 9 անչափահասների կողմից կատարված 6 հանցագործության դեպք,ապա 2016 թվականին 13 անչափահասների կողմից 11 հանցագործության դեպք է արձանագրվել»,- ասաց Մարտիրոսյանը:
Լոռու դատախազը նշեց, որ յուրաքանչյուր անչափահասի կողմից կատարվող հանցագործության դեպք մանրակրկիտ ուսումնասիրվում է, ինչպես նաև վեր են հանվում բոլոր խնդիրները ու առաջարկվում դրանց լուծման ճանապարհներ:
Բաժանորդագրվեք մեր ալիքին Telegram-ում