ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Հյուսիսային Կորայի միջուկային ներուժը գրեթե հավասար է Ամերիկայի Միացյալ Նահանգների ներուժին: Ինչպես հաղորդում է «Արմենպրես»-ը, վկայակոչելով «Ռիա նովոստի»-ն, նման հայտարարությամբ է հանդես եկել Հյուսիսային Կորեայի արտաքին գործերի նախարարության Հյուսիային Ամերիկայի հարցերով դեպարտամենտի ղեկավար Ցոյ Սոն Հին: «Մեր վերջնական նպատակը ԱՄՆ-ի հետ հավասարակշռության հասնելն է, որպեսզի նրանք մեր երկրի դեմ ռազմական գործողությունների մասին չխոսեն»,- հայտարարել է նա:

Նա նշել է, որ միջուկային զենք ունենալը Հյուսիսային Կորեայի համար «կյանքի և մահվան հարց է»: «Ընթացիկ իրավիճակն ամրապնդում է մեր համոզմունքը, որ մենք միջուկային զենքի կարիք ունենք՝ հնարավոր հարձակումը հետ մղելու համար: Մենք ապրում ենք ԱՄՆ-ի կողմից մշտական սպառնալիքների պայմաններում»,- ընդգծել է Ցոյ Սոն Հին:

Դիվանագետը նաև ասել է, որ իրենք չեն պատրաստվում իրենց սպառազինության վերաբերյալ բանակցությունների գնալ, իսկ ԱՄՆ-ն «պետք է համակերպվի Հյուսիսային Կորեայի միջուկային կարգավիճակի հետ»: Նա նաև վստահեցրել է, որ Հյուսիսային Կորեան երրորդ երկրների միջուկային զենք չի փոխանցի: