ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում տեղակայված ռուսական ռազմակայանի տանկային ստորաբաժանումները «Ալագյազ» բարձլեռնային զորափորձարանում ամփոփիչ ստուգարքներ են հանձնում 2017 թվականի ուսուցման ամառային շրջանի համար:

Ինչպես «Արմենպրես»-ին տեղեկացրել են ՌԴ Հարավային ռազմական օկրուգի մամուլի ծառայությունում, ստուգման ընթացքում Տ-72Բ տանկերի անձնակազմերը 125-միլիմետրանոց արկերով մինչեւ 4 հազար մետր հեռավորությունից հրաձգություն կիրականացնեն պայմանական հակառակորդի զրահավոր օբյեկտների վրա:

Տվյալ զինափորձարանում հրաձգության անցկացման առանձնահատկությունն այն Է, որ այն գտնվում Է ծովի մակերեւույթից ավելի քան 2 հազար մետր բարձրության վրա եւ անձնակազմերից պահանջում Է որոշակի ուղղումներ կատարել: Վարժանքներ կատարելիս տանկային անձնակազմերը տեղից եւ շարժման ընթացքում կոչնչացնեն պայմանական հակառակորդի հայտնվող եւ շարժվող թիրախները, այդ թվում՝ տանկեր, ցածր թռչող օդային թիրախներ, հրանոթներ եւ այլն:

Ստուգման ընթացքում հատուկ ուշադրություն Է դարձվելու մեծ հեռավորություններից թիրախների խոցման անձնակազմերի հմտություններին եւ բարդ ռելիեֆային տեղանքում տանկերի վարմանը: Ընդամենն ուսումնական միջոցառումներում ներգրավված են 200-ից ավելի զինծառայողներ եւ շուրջ 50 միավոր ռազմական տեխնիկա: