«Զվարթնոց» օդակայանում գործում է «Յուքոմ»-ի նոր վաճառքի և սպասարկման կենտրոն
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Ucom ընկերությունն օրերս գործարկել է նոր վաճառքի և սպասարկման կենտրոն «Զվարթնոց» օդակայանի ժամանման սրահում:
Ինչպես «Արմենպրես»-ին տեղեկացրեց «Յուքոմ» ընկերություն PR և հաղորդակցության նախագծերի ղեկավար Դիանա Մնացականյանը, կենտրոնը շուրջօրյա գրաֆիկով աշխատում է շաբաթվա բոլոր օրերին՝ իրականացնելով բոլոր գործառույթները և առաջարկելով այն ծառայությունները, որոնք տրամադրվում են Հայաստանի ողջ տարածքում գործող վաճառքի 98 կետերում:
«Այս սպասարկման կենտրոնի բացումը մեր բոլոր բաժանորդներին ու Հայաստան ժամանող հյուրերին հնարավորություն կընձեռի շատ արագ իրականացնել այն գործարքները, որոնք թույլ են տալիս մշտապես կապի մեջ մնալ մտերիմների հետ: Այնպիսի պարզագույն գործողություններ, ինչպիսիք են՝ հաշվի վերալիցքավորումը, SIM-քարտի ձեռքբերումը կամ յուրաքանչյուր հաճախորդի կարիքներին համապատասխանող լավագույն սակագնային պլանի ընտրությունը, այսուհետև հաշված րոպեների հարց է ոչ միայն սպասողների, այլև ժամանողների համար»,- նշեց Ucom ընկերության կոմերցիոն տնօրեն Արամ Բարսեղյանը։
Ucom-ի կոմերցիոն տնօրենի խոսքով՝ բազմաթիվ երկրներից ժամանող հյուրերի հիմնական հոսքի համար ընկերությունն ունի մատչելի առաջարկներ: Ներկայիս սակագնային պլանները հնարավորություն են ընձեռում անսահմանափակ զանգել ոչ միայն «Յուքոմ» ցանցի ներսում, այլև Ռուսաստանի «ՄեգաՖոն» ցանց: Ավելին, որոշ սակագնային պլանների ներառումները կարելի է օգտագործել ոչ միայն նշյալ ուղղություններով, այլև ԱՄՆ, Կանադա և Արցախ զանգելու համար:
Հայաստանի ողջ տարածքում գործում են 81 «Յուքոմ»-ի վաճառքի և սպասարկման կենտրոններ, 16 այլ վաճառակետեր և 1 շարժական վաճառքի և սպասարկման կենտրոն:
Բաժանորդագրվեք մեր ալիքին Telegram-ում