ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: ՀՀ կրթության և գիտության նախարարությունը դիտարկում է դպրոցների կառավարման համակարգի արմատական փոփոխության հարցը: «Արդեն առաջին փուլի աշխատանքներն ավարտված են: Վերցրել ենք նաև խորհրդատվություն, կփորձենք մինչև սեպտեմբեր համալիր ներկայացնել ուսուցչի կարգավիճակի, դերի, ազդեցության, հեղինակության բարձրացման ծրագիր», - «Արմենպրես»-ի փոխանցմամբ, կառավարության նիստից հետո լրագրողների հետ զրույցում ասաց ԿԳ նախարար Լևոն Մկրտչյանը:

Անդրադառնալով կեղծ դիպլոմների բացահայտման գործին՝ նախարարն ասաց, որ դիմել են արտաքին գործերի նախարարություն, ունեն մի քանի դատական վճիռ, որոնք արգելում են հիմնադրին և տնօրենին անգամ մանկավարժական գործունեություն իրականացնել: «Սեպտեմբերից, երբ դասերը կսկսվեն, կմտնենք բոլոր այդ հաստատություններ` համալիր ստուգման, որպեսզի տեսնենք, թե ինչ պայմաններում է հնարավոր դարձել կեղծ վկայականի տրամադրումը: Լավ աշխատող հաստատությունը չի կարող ինքն իրեն որոշի և վկայականը գրի տա, դա նշանակում է վերահսկման ամբողջ շղթան չի աշխատում», - ընդգծեց նախարարը։

Ընթացիկ տարվա հունվարի 13-ին Ազգային անվտանգության ծառայությունը բացահայտել էր, որ Երևան քաղաքում ու մարզերում գործող որոշ ոչ պետական բուհերի ռեկտորներ շահադիտական դրդումներով կեղծ ավարտական դիպլոմներ էին հատկացրել դասընթացներին չմասնակցած անձանց: Կեղծ դիպլոմները տրամադրվել են ոչ միայն ՀՀ, այլ նաև օտարերկրյա, այդ թվում` Իրանի, ԱՄՆ-ի, Վրաստանի, ՌԴ-ի, Ուզբեկստանի եւ Իսրայելի մի քանի տասնյակ քաղաքացիների: