ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Աշխարհի հեղինակավոր բեմերը նվաճած երաժիշտ Տիգրան Համասյանը հուլիսի 1-ին Մոնրեալի միջազգային ջազ փառատոնի շրջանակում հանդես կգա Maison սիմֆոնիկ երաժշտության դահլիճում: Մինչ այդ նա հարցազրույց է տվել Vancouver Sun-ին՝ խոսելով իր արմատների, հայկական ժառանգության հետ ունեցած ամուր կապի մասին:

Ինչպես հաղորդում է «Արմենպրես»-ը, Համասյանը նշել է, որ կարևոր է իմանալ, թե որտեղից են գալիս արմատները: «Մինչև 16 տարեկանը մեծացել եմ Հայաստանում: Կցանկանայի, որ մարդիկ ավելի շատ հետաքրքրվեն, թե որտեղից են գալիս՝ հասկանալու, թե ինչ պետք է անեն իրենց կյանքում: Բացի մորից և հորից, էլ ի՞նչ կա քո գեներում, որի մասին չգիտես, որը սակայն կարող է ազդել քեզ վրա, որը կանխորոշում է քո ճանապարհը և որի մասին կարող ես տեղեկանալ: Սա շատ կարևոր է ինձ համար»,- նշել է 29-ամյա երաժիշտը:

Մոնրեալում կայանալիք համերգին նա կատարելու է ստեղծագործություններ իր նոր ալբոմից՝ «An Ancient Observer»-ից («Հնագույն դիտորդ»):