Գեղարքունիքում նշվեց սուրբ Հովհաննես Մկրտչի գլխատման հիշատակության օրը
18:56, 22 Ապրիլ 2017
ԳԱՎԱՌ, 22 ԱՊՐԻԼԻ, ԱՐՄԵՆՊՐԵՍ: Գեղարքունիքի մարզկենտրոն Գավառ քաղաքում Սուրբ Հովհաննես Մկրտչի գլխատման հիշատակության օրը նշվեց Սուրբ Կարապետ եկեղեցում, որտեղ մարզի տարբեր համայնքներից ժամանած հավատավորները հնարավորություն ունեցան հաղորդվելու Սուրբ Հովհաննես Մկրտչի մասունքին:
«Արմենպրես»-ի տեղեկացմամբ՝ Գավառ Ս. Հովհաննես Մկրտչի գլխատման հիշատակության օրը` ապրիլի 22-ին, Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի արտոնմամբ Մայր Աթոռ Սուրբ Էջմիածնից հանդիսավոր կերպով Գեղարքունյաց թեմի Սուրբ Կարապետ եկեղեցի բերվեց Ս. Հովհաննես Մկրտչի մասունքը:
Այն սկզբից հանգրվանեց Սուրբ Աստվածածին եկեղեցում, ապա հոգեւորականներից, զինվորներից եւ հավատավոր ժողովրդից կազմված բազմամարդ թափորի ուղեկցությամբ հանգրվանեց Սուրբ Կարապետ եկեղեցում, ուր ժամը 10:30-ից մեկնարկած ծիսակատարությունն ուղեկցվեց սուրբ պատարագի արարողությամբ՝ ձեռամբ Մայր Աթոռ Սուրբ Էջմիածնի դպիր Տեր Շահե վարդապետ Անանյանի եւ մասնակցությամբ Գեղարքունյաց թեմի հոգեւոր դասի:
Եկեղեցական արարողությանը հաջորդեց մշակութային միջոցառումը Գավառ քաղաքի մշակութային հաստատությունների սաների ուժերով: Տոնակատարությունը եզրափակվեց մատաղի մատուցման արարողությամբ: Հովհաննես Մկրտչի գլխատման հիշատակության օրվա միջոցառմանը մասնակցեցին նաեւ մարզի տարածքում տեղակայված զորամասերի զինվորները: Ժողովրդի խոնարհման եւ երկրպագության համար սրբի մասունքները եկեղեցում մնացին մինչեւ ապրիլի 22-ի ժամը 17-ը, որից հետո տեղափոխվեց Մայր Աթոռ Սուրբ Էջմիածին:
«Հովհաննես Մկրտչի գլխատման հիշատակման օրը Հայ առաքելական եկեղեցին նշում է Սուրբ Հարության տոնին հաջորդող շաբաթ օրը: Նախորդ տարում եւս Գավառ քաղաք էր բերվել Սուրբ Հովհաննես Մկրտչի մասունքը: Մենք կձգտենք սա դարձնել ավանդույթ, որպեսզի ամեն տարի մեր բարեպաշտ ժողովուրդը հնարավորություն ունենա խոնարհվելու եւ հաղորդվելու մեր հավատքի գլխավոր սրբերից մեկի մասունքին»,- «Արմենպրես»-ի հետ զրույցում նշեց Գեղարքունյաց թեմի առաջնորդական տեղապահ Տեր Կիրակոս վարդապետ Դավթյանը:
Բաժանորդագրվեք մեր ալիքին Telegram-ում