ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: Ֆուտբոլի աշխարհի 5-ակի չեմպիոն Բրազիլիայի ընտրանին ապահովել է իր տեղը 2018 թվականի աշխարհի առաջնության եզրափակիչ փուլում:

«Արմենպրես»-ի հաղորդմամբ` Մունդիալ-2018-ի որակավորման փուլում Բրազիլիայի թիմը 3:0 հաշվով պարտության է մատնել Պարագվայի հավաքականին, վաստակել 33 միավոր և հարավամերիկյան խմբում գլխավորում է մրցաշարային աղյուսակը: Բրազիլացիներն այլևս չեն կարող իջնել 4-րդ հորիզոնականից ներքև, ինչը նշանակում է, որ նրանց համար աշխարհի առաջնության եզրափակիչ փուլի ուղեգիրն ապահովված է:

Հարավամերիկյան գոտում մինչ այս կայացած խաղերից հետո երկրորդ տեղում Կոլումբիայի թիմն է 24 միավորով, եռյակն եզրափակում է Ուրուգվայը (23 միավոր): 4-րդ և 5-րդ տեղերը համապատասխանաբար զբաղեցնում են Չիլիի (23 միավոր) և Արգենտինայի հավաքականները (22 միավոր):