Ժամանակը Երևանում՝ 11:07:36,   2 Հունիս

«Գյումրին առանց տնակների» հիմնադրամը դիմում է կուսակցություններին միանալ «Մեկ կուսակցություն՝ մեկ քանդվող տնակ Գյումրիում» նախաձեռնությանը

«Գյումրին առանց տնակների» հիմնադրամը դիմում է կուսակցություններին միանալ «Մեկ կուսակցություն՝ մեկ քանդվող տնակ Գյումրիում» նախաձեռնությանը

 

ԳՅՈՒՄՐԻ, 9 ՄԱՐՏԻ, ԱՐՄԵՆՊՐԵՍ : «Գյումրին՝ առանց տնակների» հիմնադրամը հանդես է գալիս «Մեկ կուսակցություն՝ մեկ քանդվող տնակ Գյումրիում» նախաձեռնությամբ: 
 «Գյումրին՝ առանց տնակների» հիմնադրամի հոգաբարձուների խորհրդի անդամները և գործադիր տնօրենը մարտի 10-ին նախատեսում են այցելություններ կատարել ՀՀ ԱԺ 2017 ապրիլի 2-ին կայանալիք խորհրդարանական ընտրություններում գրանցված բոլոր կուսակցությունների գրասենյակներ և հանդիպել կուսակցությունների ղեկավար մարմինների ներկայացուցիչների հետ։
Ինչպես «Արմենպրես»-ին տեղեկացրին հիմնադրամից, նախապես ծրագրավորված այցելությունների նպատակն է կուսակցություններին ներկայացնել հիմնադրամի գործունեությունը, ինչպես նաև առաջարկել Գյումրիում անօթևանության և տնակներում բնակվող ընտանիքների հիմնախնդիրը առաջնահերթության կարգով ներառել կուսակցության ծրագրերում՝ քարոզարշավի ընթացքում անդրադառնալով դրա լուծման հնարավոր օրենսդրական և այլ ուղիներին։ 
Հիմնադրամի պատվիրակությունը նախատեսում է առաջարկել կուսակցություններին՝ անդամների կողմից կատարված նվիրատվությունների հաշվին լուծել մեկ տնակում բնակվող մեկ ընտանիքի բնակարանի խնդիր։ Այցերի շրջանակներում բոլոր կուսակցությունների գրասենյակներին կհանձնվեն տնակների պատմությունները և լուսանկարները, ինչպես նաև խորհրդանշական տնակ-խնայատուփեր։ 
Գյումրիում 2015 թվականի դեկտեմբերին ստեղծվեց «Գյումրին՝ առանց տնակների» հիմնադրամը՝ «Տնակից տուն` մեկ քայլ» կարգախոսով փորձելով ամեն կերպ օգնել տնակներում ապրող ընտանիքներին: Հիմնադրամը գործունեություն ծավալում է հիմնականում նվիրատվությունների միջոցով: Հիմնական խնդիրը Գյումրին տնակներից ազատելն  է՝ տնակում բնակվողներին տուն տալու, տնակը քանդելու և տարածքն ազատելու միջոցով: Նվիրատվությունների միջոցով հիմնադրամին հաջողվել է 18 բնակարան հատկացնել, որոնցից 13-ը «Հայէլեկտրացանցեր» ընկերության  կողմից ՝ «SOS-Գյումրի» նախագծի շրջանակներում: Բոլոր 18 բնակարանները տրամադրվել են տնակի տարածքն ազատելու պարտադիր սկզբունքով:
Արմենուհի Մխոյան 

 

 





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ