Հայաստանի և երեք երկրների էներգամիջանցքի տեխնիկատնտեսական հիմնավորումը պատրաստ կլինի այս տարվա երկրորդ կեսին. ՌԴ նախարար
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Ռուսաստան-Վրաստան-Հայաստան-Իրան «Հյուսիս-Հարավ» էներգամիջանցքի տեխնիկատնտեսական հիմնավորումը պատրաստ կլինի 2017-ի երկրորդ կիսամյակում: «Արմենպրես»-ի փոխանցմամբ` այդ մասին լրագրողներին հայտնել է ՌԴ էներգետիկայի նախարար Ալեքսանդր Նովակը:
«Իրանի էներգետիկայի նախարարի հետ 2 էներգամիջանցք ենք քննարկել, որոնցից մեկը ՌԴ-Վրաստան-Հայաստան-Իրանն է: Հիմա մշակվում է տեխնիկատնտեսական հիմնավորումը: Այն պատրաստ կլինի 2017-ի երկրորդ կեսին»,- «ՌԻԱ Նովոստի»-ի հաղորդմամբ, նշել է նա:
«Երկրորդի մասով, որը վերաբերում է Ադրբեջանին, պայմանավորվել ենք, որ մարտի կեսին մասնագետները կհանդիպեն և կքննարկեն նախագծի իրականացումը, տեխնիկական առաջադրանքը ՏՏՀ մշակման համար»,-ասել է նա:
Մինչև 1,2 ԳՎտ ընդհանուր թողունակությամբ «Հյուսիս-Հարավ» նախագծի մշակումը սկսվել էր 2015-ի դեկտեմբերին: 2016-ի սկզբին Երևանում 4 երկրի էներգետիկայի նախարարները ստորագրեցին նախագծի «ճանապարհային քարտեզը», որով նախատեսվում էր համատեղ ՏՏՀ մշակում, ինչպես նաև փոխըմբռնման հուշագիր ստորագրվեց էլեկտրաէներգետիկայի ոլորտում համագործակցության վերաբերյալ: Նախագծի ՏՏՀ մշակման և նախագծի իրականացման հետագա միջոցառումների մասին համաձայնագիրը ստորագրվել է 2016-ի սեպտեմբերին Բաթումում:
Բաժանորդագրվեք մեր ալիքին Telegram-ում