Թուրքիայի քրդամետ կուսակցության պատգամավորն ազատ է արձակվել
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Թուրքիայի քրդամետ Ժողովուրդների դեմոկրատական կուսակցության ձերբակալված պատգամավոր Բեհչեթ Յըլդըրըմն ազատ է արձակվել: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:
Յըլդըրըմը ձերբակալվել էր փետրվարի 20-ին Ադըյամանի օդանավակայանում` Անկարա գնալու ճանապարհին: Իր ձերբակալության մասին նա հայտնել է Թվիթերի իր միկրոբլոգի միջոցով: Պատգամավորը մեղադրվում է «հանցախմբի անդամ լինելու», «հանցախմբի օգտին քարոզչություն իրականացնելու», «պետական մարմինները ստորացնելու» մեջ:
Թուրքիայի քրդամետ Ժողովուրդների դեմոկրատական կուսակցության համանախագահներ Սելահաթթին Դեմիրթաշը և Ֆիգեն Յուքսեքդաղը, ինչպես նաև կուսակցության անդամ ևս 12 պատգամավոր ձերբակալվել են:
Դիարբեքիրի հանրապետական գլխավոր դատախազությունից հայտնել են, որ ձերբակալվածների դեմ հետաքննություն է իրականացվում «զինված ահաբեկչական խմբավորման անդամ լինելու, հանցագործություն կատարելուն դրդելու և ահաբեկչական խմբավորման քարոզչությունն իրականացնելու» մեղադրանքներով:
Բաժանորդագրվեք մեր ալիքին Telegram-ում