ՀՀ-ում ԱՄԷ դեսպանությունը էլեկտրատեխնիկա է նվիրաբերել Երևանի թիվ 1 տուն- ինտերնատին
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ:Հայաստանում Արաբական Միացյալ Էմիրությունների դեսպանությունը, Շարժայի բարեգործական հիմնադրամի ֆինանսավորմամբ, փետրվարի 17-ին Երևանի №1 տուն-ինտերնատին նվիրեց անհրաժեշտ էլեկտրատեխնիկա: Այս առիթով տուն-ինտերնատում էին ԱՄԷ դեսպան Ջասիմ Մուհամմադ Ալ Քասեմին և ՀՀ աշխատանքի և սոցիալական հարցերի նախարար Արտեմ Ասատրյանը:
«ֆինանսավորող բարեգործական կազմակերպությունը հետաքրքրված է տարբեր ոլորտներում բարեգործական ծրագրեր իրականցնելու հարցում: Մենք կարևորում ենք հատկապես մեծահասակներին օգնություն ցուցաբերելը և խոստանում, որ մոտ ապագայում կլինեն նաև այլ օգնություններ՝ նույնիսկ սննդի հարցում»,- «Արմենպրես»-ի փոխանցմամբ՝ ասում է դեսպան Ջասիմ Մուհամմադ Ալ Քասեմին: Դեսպանը հետաքրքրվեց նաև տուն-ինտերնատի չվերանորոգված սենյակների վերանորոգման արժեքով և խոստացավ կապ պահել տուն-ինտերնատի տնօրենի հետ՝տրամադրելու վերանորոգման համար անհրաժեշտ գումար:
Դեսպանը հավելեց, որ մարտի 17-ին Էմիրություններում, թագաժառանգի հովանու ներքո, տեղի կունենա «Ներդրումները Հայաստանում» խորագրով մեծ կոնֆերանս, որի նպատակն է ներկայացնել ներդրումների հնարավորությունը Հայաստանում տարբեր ոլորտներում:
Վերջում դեսպանը շնորհակալություն հայտնեց, որ ընձեռել են հնարավորություն՝ օգնություն ցույց տալու:
Աշխատանքի և սոցիալական հարցերի նախարարը ևս շնորհակալություն հայտնեց դեսպանին իր բարի կամքի դրսևորման համար:
«Երկու երկրների միջև կապերը շատ լավ հիմքերի վրա են դրված և ինտենսիվորեն զարգանում են բոլոր ոլորտներում`և տնտեսական, և սոցիալական»,-ասում է նախարարն ու հույս հայտնում, որ առաջիկայում նաև միջկառավարական կապերը շատ ավելի առարկայան կդարձնեն փոխադարձ համագործակցությունը:
Աննա Գրիգորյան
Բաժանորդագրվեք մեր ալիքին Telegram-ում