Դիարբեքիրի ձերբակալված քաղաքապետերին արգելվել է հանդիպել փաստաբանների հետ
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Դիարբեքիրի հանրապետական դատախազությունը նոր որոշում է կայացրել ոստիկանության կողմից ձերբակալված քաղաքապետեր Գյուլթան Քըշանաքի և Ֆըրաթ Անլըի գործով: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:
Դատախազության որոշմամբ` ձերբակալվածները հինգ օր իրավունք չեն ունենալու հանդիպել իրենց փաստաբանների հետ:
Գյուլթան Քըշանաքի և Ֆըրաթ Անլըի փաստաբանները հայտնել են, որ պատրաստվում են բողոքարկել Դիարբեքիրի հանրապետական դատախազության որոշումը:
Դիարբեքիրի քաղաքապետեր Գյուլթան Քըշանաքը և Ֆըրաթ Անլըն անվտանգության վարչության ահաբեկչության դեմ պայքարի բաժնի կողմից հոկտեմբերի 25-ին ձերբակալվել են: Ձերբակալությունները տեղի են ունեցել Քրդական բանվորական կուսակցության (PKK) դեմ տարվող հետաքննության շրջանակում:
Կատարվածի առնչությամբ իրենց դժգոհությունն ու մտահոգությունն է հայտնել Եվրամիությունը, իսկ Դիարբեքիրում բողոքի ցույցեր են կազմակերպվել:
Բաժանորդագրվեք մեր ալիքին Telegram-ում