Հայաստանում կառավարման նոր մոդելի անհրաժեշտություն կա. Տիգրան Ջրբաշյան
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում կառավարման նոր մոդելի անհրաժեշտություն կա: «Արմենպրես»-ի մամուլի սրահում հրավիրված ասուլիսում նման կարծիք հայտնեց Հայաստանում Ամերիկյան առևտրի պալատի նախագահ Տիգրան Ջրբաշյանը:
«Դժվար է ասել, թե ինչպիսի մոդել է պետք, սակայն դա պետք է բխի որոշակի տեսլականից: Այն է, թե ինչպիսին ենք ուզում տեսնել Հայաստանը 5, 10, 20 տարիների ընթացքում: Ներկա կառավարման մոդելը բխում է այսօրվա իրավիճակից, որը, կարծում եմ, սպառել է իրեն: Այն արդյունք է պետություն-հասարակություն չգրված համաձայնագրի, սակայն ապրիլյան պատերազմը, հետագա քաղաքական զարգացումները վկայում են այն մասին, որ այդ չգրված համաձայնագիրը սպառվել է: Այն, որ փոփոխություններ պետք է լինեն՝ միանշանակ է, սակայն, թե ինչպիսին՝ դեռ պարզ չէ»,- ասաց Տիգրան Ջրբաշյանը:
Անդրադառնալով կառավարության նոր ծրագրին` Տիգրան Ջրբաշյանն առանձնացրեց որոշ կետեր կապված` բիզնեսի և պետության հարաբերությունների, էներգակիրների գների գոյացման ու դրանց դասակարգման հետ:
«Դրանք կետեր են, որոնք մինչև հիմա չեն եղել: Ծրագրում նշված են կետեր, որոնց հնարավոր է հասնել այսօրվա գործող համակարգի ներքո, առանց լուրջ փոփոխությունների: Դրանք ավելի երկարաժամկետ ծրագրի մաս չեն կազմում, բայց չմոռանանք, որ կառավարության ծրագրի վրա ազդել են որոշ սահմանափակումներ: Դրանցից է ժամկետը: Գիտենք, որ առջևում խորհրդարանական ընտրություններ են, հետևաբար սպասվում է, որ ընտրություններից հետո կլինի նոր ծրագիր: Քանի որ նախընտրական փուլ է, հետևաբար արմատական փոփոխություններ դժվար թե լինեին»,-ավելացրեց Տիգրան Ջրբաշյանն՝ ընդգծելով, որ կառավարության ծրագիրը լուծում է տակտիկական խնդիր առաջիկա կարճ ժամանակահատվածի համար:
Անդրադառնալով Հարկային օրենսգրքին` Տիգրան Ջրբաշյանը նշեց, որ այն չի համապատասխանում կառավարության կողմից հայտարարված նպատակներին: Հայաստանը մտնում է նոր փուլ, ինչն էլ, ըստ Տիգրան Ջրբաշյանի, ենթադրում է, որ Հարկային օրենսգրքի դրույթների ուղղությամբ դեռ աշխատանք կտարվի:
Բաժանորդագրվեք մեր ալիքին Telegram-ում