ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Կառավարությունը հավանություն տվեց Հայաստանի՝ Եվրասիական տնտեսական միության շրջանակներում դեղամիջոցների շրջանառության և բժշկական արտադրատեսակների շրջանառության միասնական սկզբունքների և կանոնների մասին համաձայնագրերին միանալու արձանագրություններին: ՀՀ առողջապահության նախարար Լևոն Ալթունյանը նշեց, որ համաձայնագրերի ընդունումն անհրաժեշտ է ՀՀ տնտեսական համագործակցությունը զարգացնելու, առևտրային ու տնտեսական կապերն ընդլայնելու, անվտանգ, արդյունավետ և որակյալ դեղամիջոցների հասանելիությունն ապահովելու համար:

«Համաձայնագրերը կնպաստեն ԵԱՏՄ շրջանակներում դեղամիջոցների ընդհանուր շուկայի ձևավորմանը, փոխադարձ առևտրում չհիմնավորված սահմանափակումների վերացմանը, ինչպես նաև դեղագործական արդյունաբերության զարգացմանը, անդամ պետությունների տարածքներում արտադրվող դեղագործական արտադրանքի մրցունակության բարձրացմանը և համաշխարհային շուկա դուրս գալու համար օպտիմալ պայմանների ստեղծմանը»,- «Արմենպրես»-ի փոխանցմամբ` ասաց Ալթունյանը: