Հռոմի պապը ժամանել Է Թբիլիսի
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Հռոմի կաթոլիկ եկեղեցու ղեկավար Ֆրանցիսկոսը եռօրյա պաշտոնական այցով ժամանել Է Վրաստան: Ինչպես տեղեկացնում Է «Արմենպրես»-ը, ինքնաթիռը վայրԷջք Է կատարել Թբիլիսիի Շոթա Ռուսթավելու անվան միջազգային օդանավակայանում: Շարժասանդուղքի մոտ քահանայապետին դիմավորել են Վրաստանի նախագահ Գեորգի Մարգվելաշվիլին՝ տիկնոջ հետ, Համայն Վրաստանի կաթողիկոս-պատրիարք Իլյա Երկրորդը, խորհրդարանի նախագահ Դավիթ Ուսուպաշվիլին, կառավարության անդամներ եւ Թբիլիսիի քաղաքագլուխ Դավիթ Նարմանիան:
Օդանավակայանում հավաքվել Է նաեւ Վրաստանի կաթոլիկ համայնքը՝ հանրապետության եւ Վատիկանի դրոշներով: Թբիլիսիի օդանավակայանից ոչ հեռու ընթանում Է բողոքի ակցիա, որին առայժմ մասնակցում Է ավելի քան հարյուր մարդ՝ ուղղափառ հոգեւորականության եւ հոտի ներկայացուցիչներ:
Օդանավակայանից Ֆրանցիսկոս պապը կուղեւորվի Նախագահի պալատ, որտեղ կկայանա նրա հանդիպումը Մարգվելաշվիլիի հետ, ինչից հետո նրանք հանդես կգան իշխանության, քաղաքացիական հասարակության եւ դիվանագիտական կորպուսի ներկայացուցիչներին ուղղված դիմումով:
Երեկոյան քահանայապետը կուղեւորվի Վրաստանի պատրիարքարան եւ հանդիպում կունենա Իլյա Երկրորդի հետ:
Հոկտեմբերի 1-ին Միխեիլ Մեսխիի անվան մարզադաշտում Հռոմի պապը պատարագ կմատուցի, հաղորդել Է Sputnik-ը:
Բաժանորդագրվեք մեր ալիքին Telegram-ում