Քերին ԼՂ հակամարտության կարգավորման համար պայմաններ չի տեսնում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: ԱՄՆ պետքարտուղար Ջոն Քերին կարծիք է հայտնել, որ Լեռնային Ղարաբաղի հակամարտության կարգավորման համար դեռևս պայմաններ չեն ձևավորվել: Ինչպես հաղորդում է «Արմենպրես»-ը` վկայակոչելով ՏԱՍՍ-ը, այս մասին Քերին խոսել է Վաշինգտոնում կազմակերպված ամենամյա ֆորումի ժամանակ:
Նրա խոսքով` ժամանակակից աշխարհում կան որոշ սառեցված հակամարտություններ, որոնց թվում է և ղարաբաղյան հակամարտությունը, որոնցում ներկայում չի դիտարկվում կարգավորման հնարավորությունը, քանի որ նախ և առաջ «առաջնորդները դրան պատրաստ չեն»:
ԱՄՆ պետքարտուղարը կարծիք է հայտնել, որ պաղեստինա-իսրայելական հակամարտությունը չի դասվում նման հակամարտությունների շարքին: Նրա համոզմամբ` նմանօրինակ հակամարտությունները բարդ են, սակայն կարելի է տեսնել այն միջոցները, որոնցով դրանք կարելի կլինի թողնել անցյալում, «եթե մարդիկ ընդունեն հստակ համալիր որոշումներ»: «Կարծում եմ, որ իսրայելա-պաղեստինյան հակամարտությունը մտնում է այս կատեգորիայի մեջ»,- ընդգծել է Քերին:
Բաժանորդագրվեք մեր ալիքին Telegram-ում