Եզդիերեն դասավանդող ուսուցիչներին վկայականներ հանձնվեցին
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: ՀՀ կրթության և գիտության նախարարության կրթության ազգային ինստիտուտում տեղի ունեցավ «Եզդիերեն լեզու և գրականություն» դասավանդող ուսուցիչներին վկայականներ հանձնելու արարողությունը: Ուսուցիչները վկայականներ ստացան եզդիերեն լեզվի և գրականության դասընթացներին մասնակցելուց հետո: «ՀՀ-ում եզդիերենի դասավանդումը սկսվել է 2005թ.: Ձևավորվել է եզդի ուսուցիչների մի ստվար խումբ, որոնց զարգացման, հմտությունների կատարելագործման համար պետք է ուղիներ գտնել: Եթե կա գիտելիքների պակաս, ուսուցիչները չունեն մասնագիտական որակավորում, պետք է լրացնել այդ բացը: Հույս ունեմ, որ որակավորված ուսուցիչների թիվը կմեծանա, քանի որ մերօրյա աշակերտը ձգտում է բանիմաց ուսուցչի մջոցով գիտելիք ստանալ»,- «Արմենպրես»-ի փոխանցմամբ նշեց ՀՀ վաստակավոր լրագրող Հասան Թամոյանը:
Վերապատրաստման դասընթացները տեղի են ունեցել օգոստոսի 10-15-ը: Վկայականներ ստացան Արագածոտնի, Շիրակի և Լոռվա մարզում դասավանդող ուսուցիչները: Մանկավարժները շնորհակալություն հայտնեցին ՀՀ կրթության և գիտության նախարարին իրենց ավանդույթները հարգելու և իրենց աջակցելու համար:
ՀՀ տարբեր մարզերում` Լոռիում, Շիրակում, Արագածոտնում, Արարատում, Կոտայքում, Արմավիրում եզդիերեն են դասավանդում չորս տասնյակ մանկավարժներ: Հասան Թամոյանն ընդգծեց, որ վերապատրաստման ընթացքում հատկապես մեծ ուշադրություն են դարձնում քերականությանը: Ձևաբանությունն ու շարահյուսությունը բավականին բարդ են, և շատ ուսուցիչներ լիարժեք չեն տիրապետում դրանց: Դասընթացների ժամանակ շտկվում են բացթողումները:
Վերջին անգամ եզդի ուսուցիչները վերապատրաստվել են 8 տարի առաջ: Եզդիերենի այբբենարանը լույս է տեսել 2005թ.:
Բաժանորդագրվեք մեր ալիքին Telegram-ում