Դավիթ Շահնազարյանը Հայաստանի անվտանգության ապահովման համար կարեւոր է համարում ՆԱՏՕ-ի հետ հարաբերությունները
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Տարածաշրջանային հետազոտությունների կենտրոնի վերլուծաբան Դավիթ Շահնազարյանը կարծում է, որ պետք է լրջորեն մտածել Հայաստանի աշխարհաքաղաքական կողմնորոշման մասին եւ դիմել ՆԱՏՕ անդամ պետություններին նրանցից սպառազինություններ ստանալու խնդրանքով: «Անկախ ամեն ինչից` Հայաստանի ՆԱՏՕ-ի հետ ունեցած հարաբերությունները Հայաստանի անվտանգության ապահովման կարեւոր բաղադրիչն են, որոնք պետք է ոչ միայն շարունակել, այլեւ ընդլայնել եւ խորացնել»,-«Արմենպրես»-ի հաղորդմամբ՝ ասաց նա:
Դավիթ Շահնազարյանի խոսքով՝ հուլիսի 8-9-ը Վարշավայում կայացած գագաթնաժողովում ՆԱՏՕ անդամ երկրները արտահայտեցին իրենց հստակ դիրքորոշումը Ռուսաստանի վերաբերյալ: «Նրանք հասկացան, որ Ռուսաստանը ոչ միայն խախտում է միջազգային, համաեվրոպական անվտանգության սկզբունքները եւ վտանգ ներկայացնում հարեւանների համար, այլեւ փորձում է հաստատել խաղի իր կանոնները, որոնք անընդունելի են լինելու ՆԱՏՕ-ի համար: Իմ կարծիքով՝ Ռուսաստանի ղեկավարությունը պետք է երեք հետեւություն անի Վարշավայի գագաթնաժողովից՝ շահելն անհնար է, չկորցնելը՝ եւս, խաղից դուրս գալը նույնպես անհնար է»,-եզրափակեց Դավիթ Շահնազարյանը:
Լեհաստանի մայրաքաղաք Վարշավայում հուլիսի 8-9-ը կայացավ ՆԱՏՕ-ի գագաթնաժողովը, որին մասնակցում էին Հյուսիսատլանտյան դաշինքի անդամ երկրների առաջնորդները, այդ թվում` Միացյալ Նահանգների նախագահ Բարաք Օբաման: Արևմտյան պետությունների ղեկավարներից բացի, գագաթնաժողովին մասնակցում էին նաև Դաշինքի հետ համագործակցող երկրների ղեկավարները, այդ թվում` Հայաստանի և Ադրբեջանի նախագահները:
Բաժանորդագրվեք մեր ալիքին Telegram-ում