ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: ՀՀ մշակույթի նախարարության «Հովհաննես Շարամբեյանի անվան ժողովրդական ստեղծագործության կենտրոն»-ում Ռուսաստանի գրողների միության և Հայաստանի հետ բարեկամական կապերի մոսկովյան ընկերության համատեղ ջանքերով բացվեց գրող, լուսանկարիչ Լևոն Օսեպյանի՝ «Աշխարհը մեր շուրջը» խորագրով 8-րդ անհատական լուսանկարչական աշխատանքների ցուցահանդեսը: Ցուցահանդեսը բաց կլինի մինչև հուլիսի 9-ը ներառյալ:

Լևոն Օսեպյանի՝ «Աշխարհը մեր շուրջը» խորագրով ցուցահանդեսում ընդգրկված են բազմազան բնապատկերներ, դիմանկարներ և այլ յուրօրինակ լուսանկարներ: Լուսանկարներից փոխանցվում են լուսանկարչի էմոցիաները և քնարականությունը:

Լուսանկարները` Էդուարդ Սեպետչյանի

«Հովհաննես Շարամբեյանի անվան ժողովրդական ստեղծագործության կենտրոն»-ի տնօրեն Հովիկ Հովեյանի խոսքով՝ Լևոն Օսեպյանը մեծ դեր ունի հայ-ռուսական մշակույթային կապերի զարգացման և պահպանման մեջ: «Նրա լուսանկարներում ներկայացված են Մերձավոր Արևելքը, Իտալիան և ամբողջ աշխարհը: Լուսանկարները հեղինակի այցելած վայրերի վկայությունն են»,-«Արմենպրես»-ի հաղորդմամբ` ասաց նշեց Հովեյանը:

Արվեստագետ Ալեքսանդր Թոփչյանը ընդգծեց, որ Լևոն Օսեպյանը բազմատաղանդ անձնավորություն է. «Այս ցուցահանդեսում ներկայացված է հեղինակի աշխատանքների փոքրաթիվ մասը, սակայն բոլորն էլ բարձրարժեք գործեր են: Հեղինակի մոտ լուսանկարչությունը կրում է ծիսական աշխարհընկալման բնույթ: Մենք կարող ենք փաստել, որ նրա լուսանկարները իսկական գլուխգործոցներ են»,- ասաց արվեստագետը:

Գործերի հեղինակը նշեց, որ ցուցահանդեսում իր աշխատանքների շատ քիչ մասն է ներկայացված: «Գրեթե բոլոր լուսանկարներն արված են տարբեր երկրներում, աշխատանքներ էլ կան, որ Հայաստանում եմ լուսանկարել: Ֆիքսել եմ գեղեցիկ և հետաքրքիր համայնապատկերները, ինչպես նաև դիմանկարներ»,-նշեց Լևոն Օսեպյանը:

Լևոն Օսեպյանը ծնվել է 1952 թվականին Երևանում: Բաքվում ստացել է տեխնիկական բարձրագույն կրթություն: Նրա ստեղծագործությունները թարգմանվել են բազմաթիվ լեզուներով: Ունեցել է լուսանկարչական աշխատանքների անհատական ցուցահանդեսներ Ռուսաստանում, Լեհաստանում, Չինաստանում, Իսրայելում և այլուր: Լևոն Օսեպյանի լուսանկարները գտնվում են մասնավոր հավաքածուներում (ԱՄՆ, Կանադա, Ֆրանսիա, Իտալիա, Իսպանիա, Իսրայել, Մեծ Բրիտանիա, Ավստրալիա, Իրան, Լեհաստան, Գերմանիա, Հայաստան, Հոլանդիա, Ռուսաստան):
Օսեպյանը Ռուսաստանի գրողների միության վարչության և գրողների ու հրապարակախոսների միջազգային ասոցիացիայի անդամ է: