ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Իրանի միջուկային ծրագրի վերաբերյալ Թեհրանի հետ ձեռք բերված համաձայնագիրն արգելափակող բանաձեւի շուրջ քվեարկությունից հրաժարվելու ԱՄՆ-ի Կոնգրեսի Սենատի որոշումը թույլ կտա Վաշինգտոնին միջազգային գործընկերների հետ շարունակել աշխատանքն այդ գործարքի իրացման հարցում: Այդ մասին, ինչպես տեղեկացնում է «Արմենպրես»-ը, ասված է ԱՄՆ-ի նախագահ Բարաք Օբամայի սեպտեմբերի 10-ին տարածված հայտարարության մեջ:

ԱՄՆ-ի վարչակազմի ղեկավարի կարծիքով՝ այդ իրադարձությունը նաեւ դարձել է «դիվանագիտության, ԱՄՆ-ի ազգային անվտանգության, աշխարհի անվտանգության հաղթանակը»:

Սեպտեմբերի 10-ին կայացած քվեարկության ընթացքում Դեմոկրատական կուսակցությունից ԱՄՆ-ի Սենատի անդամներին հաջողվել է արգելափակել Կոնգրեսի կողմից Իրանի միջուկային ծրագրի շուրջ համաձայնագրին հավանություն չտալու մասին բանաձեւի նախագիծը: Փաստաթուղթը մերժվել է դեռ ընթացակարգային քվեարկության փուլում, երբ պալատը պետք է որոշում կայացներ այն մասին, թե պետք Է արդյոք եզրափակիչ քվեարկություն անցկացվի բանաձեւի նախագծի շուրջ: Բանաձեւին դեմ է քվեարկել 42 սենատոր, 58-ը այն չեն պաշտպանել, մինչդեռ բանաձեւը եզրափակիչ քվեարկության դնելու համար պահանջվում էր 68 ձայն:

Սակայն այդ իրադարձությունը չի նշանակում Կոնգրեսում բանավեճերի դադարեցում, այդ հարցի շուրջ քվեարկություն պետք է կայանա նաեւ Ներկայացուցիչների պալատում, որտեղ քննարկվում է բանաձեւի միանգամից երեք նախագիծ, հաղորդել է ՏԱՍՍ-ը:

Լուսանկարը`AP