ՌԴ ԱԳՆ-ն մտահոգված է Լիբանանում ներքաղաքական իրադրության սրմամբ
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Ռուսաստանի Դաշնությունում խորն անհանգստությամբ են ընդունել Լիբանանում ներքաղաքական իրավիճակի սրումը: Ինչպես հաղորդում է «Արմենպրես»-ը, վկայակոչելով ՏԱՍՍ-ը, այս մասին ասվում է ՌԴ արտաքին գործերի նախարարության տարածած մեկնաբանության մեջ: «Վերջին օրերին նկատելիորեն սրվել է ներքաղաքական իրավիճակը Լիբանանում»,- ասված է փաստաթղթում: Օգոստոսի 22-23-ը Բեյրութի կենտորնական մասում անցկացվել են զանգվածային ցույցեր, որոնք որոշ դեպքում վերածվել են բախումների օրինապահ մարմինների ներկայացուցիչների հետ:
Ինչպես նշվում է ԶԼՄ-ներում, բախումների արդյունքում տասնյակ ցուցարարներ և ոստիկանության անդամներ են վնասվածքներ ստացել: Այս ամենի համար առիթ են հանդիսացել Լիբանանում վերջին շրջանում կենցաղային թափոնների վերացման և տեղափոխման հետ կապված խնդիրները, սակայն ցուցարարները առաջ են բերում քաղաքական կարգախոսներ` պահանջելով կառավարության հրաժարականը: «Ակնհայտ է, որ երկրի նախագահի թեկնածուի շուրջ ազգային համաձայնության բացակայության և միջազգային ահաբեկչության մարտահրավերների պայմաններում չափազանց կարևոր է պահպանել երկրի կայունությունը և թույլ չտալ հասարակական-քաղաքական հակադրությունների խորացումը»,- նշվել է ՌԴ ԱԳՆ-ի հաղորդագրության մեջ:
ՌԴ աչտաքին քաղաքական գերատեսչությունը կարևորել է ներքին օրակարգային հարցերում լիբանանյան քաղաքական ուժերի կողմից լայն երկխոսություն ծավալելու անհրաժեշտությունը` հավատարիմ մնալով երկրի ինքնիշխանության, միասնականության, տարածքային ամբողջականության և ժողովրդավարական հիմքերին:
Լուսանկարը` ТАСС
Բաժանորդագրվեք մեր ալիքին Telegram-ում