Իրաքում ահաբեկիչներից երկու շրջաններ են ազատագրվել
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: Իրաքյան ուժերն Անբարի ազատագրման գործողությունների շրջանակներում հուլիսի 16-ին երկու շրջաններ են ազատագրել: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, իրաքյան միասնական ուժերն ազատագրել են Մամալ Սալջ շրջանը, որը գտնվում է Անբարի նահանգի արևելյան հատվածում: Բախումների ժամանակ ութ ահաբեկիչներ են սպանվել, որոնց թվում երկու մահապարտ-ահաբեկիչներ, ոչնչացվել են երեք փոխադրամիջոցներ:
Ազատագրվել է Մուհամիդա գյուղը, որը գտնվում է Ֆալլուջայի հյուսիսում. սպանվել են 15 ահաբեկիչներ:
Իրաքի ներքին գործերի նախարարության տեղեկություններով՝ Անբար նահանգի արևմուտքում 70-ից ավելի ահաբեկիչներ, այդ թվում երկու ղեկավարներ են սպանվել իրաքյան օդուժի հարվածների հետևանքով:
Ավելի վաղ՝ հուլիսի 13-ին, իրաքյան բանակի ղեկավարությունը հայտարարել է Անբար նահանգի ազատագրման ռազմական գործողությունների մեկնարկի մասին: Իրաքի պաշտպանության նախարարի խոսնակ Յահյա ազ Զուբեյդին նշել է, որ ազատագրման գործողությունները սկսվել են հուլիսի 13-ի առավոտյան՝ ավելացնելով, որ զինված ուժերը, ազգային կամավորական ջոկատները, ոստիկանությունը, Անբարի ցեղախմբերը միասնական պայքարում են «Իսլամական պետության» դեմ:
ԻՊ-ի վերահսկողության տակ է գտնվում նահանգի 80 տոկոսը:
Բաժանորդագրվեք մեր ալիքին Telegram-ում