ԵՐԵՎԱՆ, 9 ՄԱՅԻՍԻ, ԱՐՄԵՆՊՐԵՍ: Հայրենական Մեծ պատերազմում տարած հաղթանակի 90-ամյակի կապակցությամբ ՀՀ Զինված ուժերի «Մայր Հայաստան»  զինվորական թանգարանը հանդես է եկել նոր ցուցադրությամբ: «Արմենպրես»-ի հետ զրույցում թանգարանի տնօրեն Ավագ Հարությունյանը նշում է, որ նոր ցուցադրությունից հատկապես Նեմեսիս գործողությանը նվիրված ցուցադրության, Կամավորական շարժումներին, մարտերի 100-ամյակին նվիրված ցուցադրությունների, մերօրյա հերոսների, նախորդ տարի ադրբեջանական ագրեսիային դիմակայած եւ հերոսի մահով ընկած զինվորների մասին զուցադրությունների մոտ միշտ մարդաշատ է:

«Կապ չունի` տարեդարձ է, հոբելյան է, թե ոչ: Մեր թանգարանը միշտ մարդաշատ է: Միայն նախորդ տարի 75 պետության շուրջ 65 հազար այցելու ենք ունեցել: Նրանք բոլորն էլ տպավորված են հեռանում թանգարանից»,- ասաց Հարությունյանը` հավելելով, որ Հայրենական Մեծ պատերազմին եւ Արցախյան պատերազմին նվիրված ցուցանմուշների թիվն անցնում է 30. հազարը:

«Թանգարանում նաեւ հավաքչական, համալրման աշխատանք ենք իրականացնում, որպեսզի ցուցանմուշների թիվն ավելանա: Շատ ճիշտ կլինի, որպեսզի մեր համաքաղաքացիներն իրենց տանն ունեցած փաստաթղթերը, լուսանկարները հանձնեն թանգարանին: Այստեղ դրանք ապահով ձեռքերում կլինեն»,- ասաց Հարությունյանը:

Հաշվի առնելով հանգամանքը, որ ցուցանմուշների թիվը շատ է, իսկ տարածքը փոքր, Պաշտպանության նախարարությունը որոշում է կայացրել Եռաբլուր պանթեոնում  Արցախյան ազատամարտին նվիրված թանգարան կառուցել: