ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Հայաստանում Ուկրաինայի նախկին դեսպան և հայագետ Ալեքսանդր Բոժկոն արժանացավ ՀԲԸՄ «Կարպիս Փափազյան» ոսկե մրցանակի: «Արմենպրես»-ի հաղորդմամբ՝ հայանպաստ գոծունեություն ծավալելու համար օտարերկրյա քաղաքացիներին տրվող թվով 27-րդ մրցանակը ուկրաինացի հայագետին հաձնվեց ապրիլի 4-ին Երևանում տեղի ունեցած Հայկական բարեգործական ընդհանուր միության 88-րդ ընդհանուր ժողովի ժամանակ:

«Ինձ համար հատուկ կարևորություն ունի այն հանգամանքը, որ մրցանակը շնորհվում է Հայոց ցեղասպանության 100-րդ տարելիցի նախօրեին: Ուկրաինայում շատ անգամ եմ գրել հայ ժողովրդի այս ողբերգության մասին և կցանկանամ հավաստիացնել իմ հայ եղբայրներին և քույրերին, որ ամենը կանեմ, որպեսզի իմ երկիրը պաշտոնապես ճանաչի և դատապարտի մարդկության դեմ կատարած այս ոճրագործությունը»,- նշեց Ալեքսանդր Բոժկոն:

Հայագետն ընդգծեց, որ հետագայում կշակունակի իր թարգմանչական աշխատանքներն` օրինակ բերելով վերջերս «Կիև» ամսագրում լույս տեսած գրաբարից թարգմանությունը` 14-17 դդ. Ուկրաինայի տարածքում ստեղծված «Կանեմիս» հայկական տարեգրությունը: Իսկ «Կարպիս Փափազյան» մրցանակը հայագետին թույլ կտա այդ թարգմանությունը լույս ընծայել առանձին գրքի տեսքով՝ ուկրաիներեն: