Խորհրդարանը սկսել է ԵՏՄ-ի հետ կապված մաքսային կարգավորումների նախագծի քննարկումը
ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը մաքսային կարգավորումների վերաբերյալ օրենքի նախագիծ է ներկայացրել, որը պայմանավորված է Եվրասիական տնտեսական միությանը Հայաստանի անդամակցությամբ: Համապատասխան օրենքի նախագիծը խորհրդարանի քննարկմանը ներկայացրեց ՀՀ ֆինանսների նախարարի տեղակալ Վախթանգ Միրումյանը: «Օրենսդրական փաթեթի այս ներկայացումն անմիջականորեն կապված է Եվրասիական տնտեսական միությանը Հայաստանի անդամակցության հետ և կոչված է ապահովել այն հարաբերությունների իրավական բազան, որոնք առաջանում են այդ անդամակցության գործընթացով պայմանավորված: Առաջարկվող փոփոխությունները կապված են ինչպես միության անդամ այլ երկրներից ապրանքների ներմուծման կամ արտահանման հարաբերությունների հետ, այնպես էլ երրորդ երկրներից նման հարաբերությունների կարգավորման հետ»,- «Արմենպրես»-ի հաղորդմամբ՝ նշեց Միրումյանը:
Նա ընդգծեց, որ գաղտնիք չէ, որ ԵՏՄ-ին Հայաստանի անդամակցությունը նշանակում է մի քանի այլ իրավական ակտերով հարաբերությունների կարգավորում: «Մասնավորապես, հիմնական փաստաթղթերն են Եվրասիական տնտեսական միությանն անդամակցելու պայամանգիրն ու 5 հավելվածները, որոնք կարգավորում են մաքսային հարաբերությունները միության հիմնական անդամ երկրների միջև, նաեւ` Եվրասիական տնտեսական միության հիմնադրման մասին համաձայնագիրը և, իհարկե, միության մաքսային օրենսգիրքը համապատասխան որոշումներով»,- նշեց Միրումյանը:
Անդրադառնալով օրենսդրական փաթեթի ներկայացման անհրաժեշտությանը՝ Միրումյանն ընդգծեց, որ դա պայմանավորված է նրանով, որ մի շարք կարգավորումներ վերապահված է անդամակցող երկրին, և անդամակցող երկիրը պետք է ընդունի համապատասխան օրենքներ կամ կարգավորումներ, որպեսզի սահմանվեն հարաբերությունները բոլոր այն դեպքերի համար, երբ վերը նշված փաստաթղթերով այդ կարգավորումը պարզապես վերապահված է համապատասխան անդամակցող երկրին:
Մաքսային կարգավորման մասին ՀՀ օրենքի նախագծով առաջարկվում է կարգավորել ՀՀ տարածքով ապրանքների տեղափոխման, հայտարարագրման, մաքսային վճարների կատարման, մաքսային հսկողության, ինչպես նաև մաքսային մարմինների իրավունքների և պարտավորությունների հետ կապված հարցերը:
Բաժանորդագրվեք մեր ալիքին Telegram-ում