Սիրիական բանակը տարածքներ է գրավել Հալեպում
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիական բանակը վերահսկողություն է հաստատել Հալեպի հյուսիսում գտնվող Հանդարաթ շրջանի մերձակայքում գտնվող ալ Հալաբի ագարակի և Թել Մդաֆա շրջանի վրա: Ինչպես հաղորդում է «Արմենպրես»-ը՝ վկայակոչելով լիբանանյան «Ալ Մայադին» գործակալությունը, թեժ բախումներ են ընթանում Հալեպի Բանի Զեյդ թաղամասում սիրիական և ազատ բանակների միջև: Տեղեկություններ են ստացվել, որ Սիրիայի ազատ բանակի տասնյակ անդամներ են սպանվել և վիրավորվել:
ՍԱՆԱ գործակալության տեղեկացմամբ, սիրիական բանակը զինյալների թաքստոցներ է ոչնչացրել Հալեպի մերձակա գյուղերում: Համաձայն նույն աղբյուրի, Հոմսի Թել Աբու Սանասիլ գյուղում բանակը հարձակվել է զինյալների վրա, կանխել նրանց Ջաբուրին գյուղ ներխուժելու փորձը: Տեղի ունեցած բախումների ժամանակ տասնյակ զինյալներ են սպանվել և վիրավորվել:
«Ալ Ջազիրա»-ն տեղեկացնում է, որ Դամասկոսի Դումա գյուղում հոկտեմբերի 19-ին ականապատ մեքենայի պայթյունից վիրավորվել է Ահմադ Տահան` Սիրիայի ընդդիմության ղեկավարներից մեկը, սպանվել է նրա որդին:
Սիրիական իշխանությունների տեղեկացմամբ, Սիրիայում ընդդիմադիրների շարքերում կառավարական ուժերի դեմ պայքար են մղում աշխարհի ավելի քան 80 երկրների 100 հազարից ավելի ապստամբներ:
Բաժանորդագրվեք մեր ալիքին Telegram-ում