ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Բայկոնուր տիեզերակայանի նոր ղեկավար է նշանակվել Միխայիլ Վարդանյանը: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել է Ռոսկոսմոսի մամուլի ծառայության ղեկավար Իրինա Զուբարեւան:

«Հաստատում եմ Միխայիլ Վարդանյանին «Վերգետնյա տիեզերական ենթակառուցվածքի օբյեկտների շահագործման կենտրոն-»Յուժնի» տիեզերական կենտրոն» համերկրային պետական ունիտար ձեռնարկության մասնաճյուղի տնօրենի պաշտոնում նշանակելու մասին հրամանը»,- նշել է նա:

Միխայիլ Վարդանյանը ծնվել է 1959 թվականի մարտի 20-ին Գրոզնի քաղաքում: 1981 թվականին ավարտել է Մոժայսկու անվան ռազմաինժեներական ինստիտուտը, 1990 թվականին՝ Ձերժինսկու անվան ռազմական ակադեմիան:

Վարդանյանի ամբողջ կյանքն ու կարիերան կապված է Բայկոնուրի հետ: 1981-ից մինչեւ 2011 թվականը նա տիեզերակայանում ծառայել է ԽՍՀՄ-ի եւ Ռուսաստանի զինված ուժերի ինժեներային եւ հրամանատարաշտաբային պաշտոններում, զորամասերից մեկի բաժանմունքի ինժեներից հասնելով Ռուսաստանի պաշտպանության նախարարության հինգերորդ պետական փորձարարական տիեզերակայանի պետի պաշտոնին (Բայկոնուր տիեզերակայանն այդպես էր կոչվում մինչեւ իր ապառազմականացումը):

Վերջին տարիներին Վարդանյանն աշխատում էր «Կորպորացիա «ՎՆԻԻԷՄ» ԲԲԸ-ում որպես գլխավոր տնօրենի տեղակալ, «Վերգետնյա տիեզերական ենթակառուցվածք» ընկերության ղեկավար: