ԵՐԵՎԱՆ, 28 ՆՈՅԵՄԲԵՐ, ԱՐՄԵՆՊՐԵՍ: Ամանորի տոներին Երեւանի տարբերանշանն է լինելու ոսկեգույն երանգներով հրեշտակը, իսկ տոնական ձևավորումներն իրականացվելու են նոր մշակված Ամանորի հայեցակարգի հիման վրա. մայրաքաղաքն այս տարվա տոնական օրերին կներկայանա ոսկեգույն եւ կապույտ գույներով: Ինչպես «Արմենպրես»-ին տեղեկացրին Երևանի քաղաքպետարանի աշխատակազմի արտաքին ձևավորման և գովազդի վարչությունից, մայրաքաղաքի տոնական ձևավորումներն արդեն սկսվել են եւ կընթանան մինչեւ դեկտեմբերի 20–ը:

Հանրապետության Հրապարակում տեղադրված գլխավոր տոնածառն ամբողջությամբ պատրաստ կլինի դեկտեմբերի 15-ին, իսկ լույսերի վառման արարողությունը տեղի կունենա դեկտեմբերի 20–ին։ Հանրապետության գլխավոր եղևնու ճյուղերը բերվելու են ՀՀ տարբեր մարզերից` սանիտարական հատման արդյունքում։ Տոնածառի բարձրությունը լինելու է 32 մետր։  Մայրաքաղաքի տոնական զարդարման համար բավարար միջոցներ կան, որոնք հատկացվել են համայնքային բյուջեից, ինչպես նաև նվիրաբերվել են գործընկերների կողմից:

Տոնական ձեւավորում կունենան մայրաքաղաքի բոլոր վարչական շրջանները: Ամանորի տոներին նախատեսվում են բազմաթիվ անակնկալներ և տոնական միջոցառումներ։