Սաֆարովի արտահանձման հարցը ներառվել է Հունգարիայի Ազգային անվտանգության մարմնի օրակարգում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Հունգարիայի Ազգային անվտանգության մարմնի օրակարգում կրկին ներառվել է ադրբեջանցի ոճրագործ Ռամիլ Սաֆորովի արտահանձնման թեման: Ինչպես հաղորդում է «Արմենպրես»-ը` վկայակոչելով atv.hu-ն, նախապես հաղորդվում էր, որ Անվտանգության մարմնի օրակարգից այս հարցը հանվել է: Հունգարական կայքը նաև տեղեկացնում է, որ Սաֆարովի հարցը քննարկվել էր նաև հունգարական խորհրդարանի արտաքին հարաբերությունների հանձնաժողովում:
2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերենի դասընթացներին ՆԱՏՕ-ի ծրագրի շրջանակում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: 2012թ-ի օգոստոսի 31-ին Հունգարիայի իշխանությունները որոշում կայացրին արտահանձնել Սաֆարովին Ադրբեջանին: Ադրբեջան արտահանձնվելուց հետո ոճրագործն արժանացավ նախագահ Իլհամ Ալիեւի ներմանը, նրան շնորհեցին մայորի կոչում, ապահովեցին բնակարանով, անձնագրով եւ հերոսացրին: Հայաստանը կասեցրեց դիվանագիտական հարաբերությունները եւ պաշտոնական կապերը Հունգարիայի հետ:
Բաժանորդագրվեք մեր ալիքին Telegram-ում