ՍՏԵՓԱՆԱԿԵՐՏ, 26 ՄԱՅԻՍԻ, ԱՐՄԵՆՊՐԵՍ: «Հայաստան» համահայկական հիմնադրամի հոգաբարձուների խորհրդի 20-րդ նիստի շրջանակներում Արցախում գտնվող հիմնադրամի տեղական մարմինների ներկայացուցիչներն ու հոգաբարձուների խորհրդի անդամներն այսօր բերդաքաղաք Շուշիում մասնակցեցին հիմնադրամի միջոցներով կապիտալ վերանորոգված Ղազանչեցոց փողոցի բացման հանդիսավոր արարողությանը : Ներկա էր նաեւ Լեռնային Ղարաբաղի Հանրապետության նախագահ Բակո Սահակյանը:

Ղազանչեցոց փողոցի բացումից առաջ նախ օրհնության կարգ կատարվեց Հայ առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանի կողմից: Այնուհետեւ կարմիր ժապավենը կտրելու պատիվը տրվեց «Հայաստան» համահայկական հիմնադրամի' Բրազիլիայի հոգաբարձուների խորհրդի անդամ Աննա Աբովյանին:

Ինչպես «Արմենպրես»-ի հետ զրույցում ասաց Աննա Աբովյանը, ինքն առաջին անգամն է Արցախ այցելում: Խոսելով իր առաջին տպավորությունների մասին' Ա. Աբովյանը նշեց, որ հիացած է Արցախի, մասնավորապես' Շուշիի գեղեցկությամբ ու հերոսական անցյալով: «Սփյուռքում մենք իսկապես հայապահպանության խնդիր ունենք: Այս առումով պետք է նշեմ, որ մեր հիմնական գործը պետք է լինի հայրենիքի հզորացումը, քանի որ մեր ազգի ապագան հայրենիքում է»,- ասաց Ա. Աբովյանը:

Ղազանչեցոց փողոցի բացմանը ներկա էին նաեւ ԼՂՀ Ազգային ժողովի փոխնախագահ Արթուր Թովմասյանը, ԼՂՀ փոխվարչապետ Սպարտակ Թեւոսյանը, ԼՂՀ մշակույթի եւ երիտասարդության հարցերի նախարար Նարինե Աղաբալյանը, պաշտոնատար այլ անձինք: