ԳԱՎԱՌ, 29 ՄԱՅԻՍԻ, ԱՐՄԵՆՊՐԵՍ։ Գեղարքունիքի մարզի Գավառ համայնքի  Գանձակ գյուղում հանդիսավոր կերպով տեղի ունեցավ «Ռուսաց լեզվի և մշակույթի կենտրոնի» բացման արարողությունը:

 Ինչպես «Արմենպրես»-ին տեղեկացրին Գավառի համայնքապետարանի աշխատակազմից,  նախաձեռնությունը կյանքի է կոչվել Գավառի համայնքապետարանի և «Հաղորդակցության զարգացման միջազգային ինստիտուտ» հումանիտար հիմնադրամի համագործակցությամբ։ Համայնքապետարանը կենտրոնի համար Գանձակի վարչական ղեկավարի նստավայրից անհատույց հատկացրել է համապատասխան տարածք, որը վերանորոգվել ու կահավորվել է «Հաղորդակցության զարգացման միջազգային ինստիտուտ» հումանիտար հիմնադրամի կողմից։

Կենտրոնը կազմակերպելու է ռուսաց լեզվի դասընթացներ, թեմատիկ քննարկումներ, ճամբարներ, կինոդիտումներ և մշակութային այլ նախաձեռնություններ։

Բացման արարողությանը մասնակցում էին Հայաստանի Հանրապետությունում Ռուսաստանի դեսպանատան աշխատակիցներ,  մարզային ու համայնքային իշխանությունների, «Հաղորդակցության զարգացման միջազգային ինստիտուտ» հումանիտար հիմնադրամի ներկայացուցիչներ։

Խոսրով Խլղաթյան