ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Ռուսական խաղաղապահ զորախմբի ներկայությունը հիմնական երաշխիքներից մեկն է, որ զսպում է թուրք-ադրբեջանական տանդեմին ավարտին հասցնել իրենց ծրագրերը՝ կապված Արցախը հայաթափելու հետ: «Արմենպրես»-ի փոխանցմամբ՝ Երևան-Ստեփանակերտ տեսակամուրջի ընթացքում այս մասին ասաց Արցախի Հանրապետության արտաքին գործերի նորանշանակ նախարար Սերգեյ Ղազարյանը:

«Այս կոնկրետ իրավիճակում, հիմնական նպատակներից մեկը, որն ադրբեջանական կողմը հետապնդում էր, այն էր, որպեսզի հայկական բնակչության կողմից դժգոհության ալիք բարձրանա ՌԴ խաղաղապահների նկատմամբ: Ադրբեջանը փորձում է ամեն կերպ հեղինակազրկել ՌԴ խաղաղապահների գործունեությունը»,- ասաց Ղազարյանը:

Նա ընդգծեց, որ ստեղծված իրավիճակում ավելի է կարևորվում ՌԴ խաղաղապահների դերը, քանի որ Ադրբեջանն ամեն կերպ խոչընդոտում է, որպեսզի Արցախ պարենային մթերք, դեղորայք ներկրվի, իսկ ՌԴ խաղաղապահները պետք է ներգրավված լինեն, որպեսզի առաջին անհրաժեշտության ապրանքներ ներկրվեն Արցախի Հանրապետություն: