Ժամանակը Երևանում՝ 11:07:36,   12 Օգոստոս 2022

Ախուրյանում բացվեց 44-օրյա պատերազմի զոհերի հիշատակին նվիրված հուշահամալիր ու Զինվորի պուրակ

Ախուրյանում բացվեց 44-օրյա պատերազմի զոհերի հիշատակին նվիրված 
հուշահամալիր ու Զինվորի պուրակ

ԳՅՈՒՄՐԻ, 3 ՀՈՒԼԻՍԻ, ԱՐՄԵՆՊՐԵՍ։ Շիրակի մարզի Ախուրյան համայնքի «Մայր Հայաստան» կոթողի տարածքում հուլիսի 3-ին բացվեց 44-օրյա պատերազմի զոհերի հիշատակին նվիրված հուշահամալիր ու Զինվորի պուրակ: Ձեռամբ Շիրակի թեմի հոգևորականների կատարվեց պուրակում տեղադրված խաչքարի օրհնության կարգ: Ինչպես տեղեկացնում է «Արմենպրես»-ը, ի հիշատակ անմահ զինվորների՝ պուրակ ստեղծելու նախաձեռնությունը ամերիկաբնակ, ծնունդով ախուրյանցի Դավիթ Սաֆարյանինն է՝ Սաֆարյան ընտանիքի կողմից: Պուրակի տարածքը՝ խաչքար ու հուշակոթող, ամբողջանում է երեխաների համար նախատեսված խաղահրապարակով:

44-օրյա պատերազմին միայն Ախուրյան բնակավայրը 7 զոհ է ունեցել, ողջ համայնքը՝ 29: «Ախուրյանում այսօր այս գեղեցիկ պուրակն է բացվում. այն աշխատանքը, որ կատարվել է, անհնար է չնկատել: Սա Դավիթ Սաֆարյանի առաջին բարեգործությունը չէ. Դավիթը, չնայած երկար տարիներ է, ինչ բնակվում է ԱՄՆ-ում՝ միշտ եղել է բանակի կողքին, ներդրումներ է ունեցել նաև 44-օրյա պատերազմի ժամանակ: 

Այգին նաև դաստիարակչական նշանակություն է ունենալու մեր երեխաների համար. մենք մեր զոհված հերոսների օրինակով պետք է մեծացնենք մեր մատաղ սերունդներին: Մեր հերոսները չեն մահացել՝ նրանք անմահացել են՝ տվել են իրենց կյանքը, որպեսզի մեր հողն ու ջուրը ու մեր խաղաղությունը պահենք»,- իր խոսքում նշեց Ախուրյան համայնքի ղեկավար Արծրուն Իգիթյանը՝ հավելելով, որ այսուհետ պուրակը լինելու է ուխտատեղի՝ սերունդների համար:

Խաչքարի բացման պատիվը տրվեց 44-օրյա պատերազմում զոհված ախուրյանցի հերոսների ծնողներին ու բարերարին:

«Ախուրյանում եմ ծնվել ու մեծացել, մինչև 15 տարեկանս այստեղ եմ ապրել, 44-օրյա պատերազմում զոհված բոլոր ախուրյանցի տղաներն ինձ հարազատ են: Պուրակ կառուցելու գաղափարն անմիջապես պատերազմից հետո է ծնվել՝ հինգ ամիս է պահանջվել ամբողջացնելու նախատեսված աշխատանքը»,- լրագրողների հետ ճեպազրույցի ժամանակ նշեց Դավիթ Սաֆարյանը՝ տեղեկացնելով, որ ամեն տարի է Հայաստան գալիս, կապը հայրենի երկրի հետ պահում է, իսկ այսօր Զինվորի պուրակի բացմանը ներկա էին նաև նրա զավակները։ 

Արմենուհի Մխոյան   








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]