Ժամանակը Երևանում՝ 11:07:36,   18 Մայիս

ԿԳՄՍ փոխնախարարն ընդունել է ՀՀ-ում Բանգլադեշի Ժողովրդական Հանրապետության դեսպանին

ԿԳՄՍ փոխնախարարն ընդունել է ՀՀ-ում Բանգլադեշի Ժողովրդական Հանրապետության 
դեսպանին

ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Կրթության, գիտության, մշակույթի և սպորտի նախարարի տեղակալ Արթուր Մարտիրոսյանը հունվարի 25-ին ընդունել է ՀՀ-ում Բանգլադեշի Ժողովրդական Հանրապետության արտակարգ և լիազոր դեսպան Գուսալ Ազամ Սարքերի գլխավորած պատվիրակությանը:

Ինչպես «Արմենպրես»-ը տեղեկանում է ԿԳՄՍ նախարարության տարածած հաղորդագրությունից, կողմերը քննարկել են կրթության և մշակույթի ոլորտներում համագործակցության ներկա իրավիճակն ու հեռանկարները:

«Ի պատասխան Հայաստանի բարձրագույն կրթական հաստատություններում Բանգլադեշում առկա հետաքրքրության և այդ ուղղությամբ ջանքեր գործադրելու դեսպանի պատրաստակամությանը՝ ԿԳՄՍ նախարարի տեղակալ Արթուր Մարտիրոսյանը ներկայացրել է բարձրագույն կրթության ոլորտում ներկայում իրականացվող բարեփոխումները: Բարձրագույն կրթության միջազգայնացման համատեքստում Արթուր Մարտիրոսյանը կարևորել է օտարերկրյա ուսանողների ներգրավման, պրոֆեսորադասախոսական կազմի և ուսանողների շարժունության ապահովման և միջբուհական համագործակցության զարգացման բաղադրիչները»,- նշված է հաղորդագրության մեջ:

Կողմերը ներկայացրել են իրենց երկրների բուհերում օտարերկրյա ուսանողների համար նախատեսված իրավակարգավորումները, մասնագիտությունների առաջնահերթությունները և այլ խնդիրների վերաբերող հարցեր: Անդրադարձ է եղել նաև բարձրագույն կրթության որակի ապահովման և միջբուհական համագործակցության զարգացման հնարավորություններին:

Հանդիպման ընթացքում կողմերը քննարկել են նաև արտերկրում հայկական մշակութային ժառանգության կարևոր նմուշ հանդիսացող Դաքքայի Սուրբ Հարություն հայկական եկեղեցու պահպանման, վերականգնման և ՅՈՒՆԵՍԿՕ-ի՝ համաշխարհային ժառանգության ցանկում ընդգրկելու գործընթացը: Ողջունելով Բանգլադեշի կառավարության այդ նախաձեռնությունը՝ մշակութային ժառանգության պահպանման՝ պետությունների հանձնառության շրջանակում ԿԳՄՍ նախարարի տեղակալը պատրաստակամություն է հայտնել փորձագիտական աջակցություն ցուցաբերելու ՅՈՒՆԵՍԿՕ–ին համապատասխան հայտի ներկայացման գործընթացում և դեսպանի ուշադրությունն է հրավիրել 2020 թվականի պատերազմի հետևանքով Ադրբեջանի վերահսկողության ներքո անցած տարածքներում հայկական պատմամշակութային ժառանգության պահպանության խնդրին: Նա հույս է հայտնել, որ գործընկեր երկրների կողմից իրավիճակի արձանագրումների արդյունքում Ադրբեջանը զերծ կմնա իր հսկողության ներքո հայտնված հազարավոր հայկական պատմամշակութային հուշարձանները ոչնչացնելուց և դրանց ծագումն աղավաղելուց:

Հանդիպմանն անդրադարձ է եղել երկու երկրների միջև մշակույթի ոլորտում համագործակցության համաձայնագրի ստորագրման հնարավորությանը: Կողմերը քննարկել են նաև կրթության և մշակույթի ոլորտներում երկկողմանի հետաքրքրություն ներկայացնող այլ հարցեր:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]