Ժամանակը Երևանում՝ 11:07:36,   29 Հունիս 2022

Այս պահի դրությամբ Թուրքիայի հետ որևէ բանակցային գործընթաց չի ընթանում. ՀՀ ԱԳՆ խոսնակ

Այս պահի դրությամբ Թուրքիայի հետ որևէ բանակցային գործընթաց չի ընթանում. ՀՀ 
ԱԳՆ խոսնակ

ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Այս պահի դրությամբ Հայաստանի և Թուրքիայի միջև երկկողմ հարաբերությունների կարգավորման շուրջ բանակցություններ չեն ընթանում:

Այդ մասին «Արմենպրես»-ի հետ զրույցում հայտնեց ՀՀ արտաքին գործերի նախարարության մամուլի քարտուղար Վահան Հունանյանը՝ անդրադառնալով հայ-թուրքական հարաբերությունների կարգավորման շուրջ ընթացող քննարկումներին:

«Ինչպես արձանագրված է կառավարության ծրագրում՝ Հայաստանը մշտապես պատրաստ է եղել Թուրքիայի հետ առանց նախապայմանների հարաբերությունների կարգավորմանը: Մի շարք միջազգային գործընկերներ, այդ թվում մեր դաշնակից Ռուսաստանը, հայտարարել են, որ պատրաստ են աջակցել հայ-թուրքական հարաբերությունների կարգավորման գործընթացին: Եվ ռուս գործընկերների հետ քննարկումների ընթացքում մենք տեղեկացրել ենք, որ պատրաստ ենք առանց նախապայմանների հարաբերությունների կարգավորմանը: Եթե ու երբ գործընթացը առաջ գնա՝ մենք, բնականաբար, հանրությանը զարգացումների մասին կտեղեկացնենք: Միաժամանակ նշեմ, որ այս պահի դրությամբ Թուրքիայի հետ որևէ բանակցային գործընթաց չի ընթանում», - «Արմենպրես»-ին հայտնեց ՀՀ ԱԳՆ մամուլի խոսնակ Վահան Հունանյանը:

ՀՀ կառավարության 2021-2026 թթ. հնգամյա ծրագրի «Արտաքին քաղաքականություն» բաժնում նշվում է, որ Հայաստանը մշտապես պատրաստ է եղել Թուրքիայի հետ առանց նախապայմանների հարաբերությունների կարգավորմանը, որը բխում է տարածաշրջանի կայունության, անվտանգության և տնտեսական զարգացման շահերից, և «այսօր էլ Հայաստանի Հանրապետությունը պատրաստակամ է ջանքեր գործադրելու Թուրքիայի հետ հարաբերությունների կարգավորման ուղղությամբ»:

2021 թ. օգոստոսից Երևանը և Անկարան մի քանի անգամ բարձր մակարդակով փոխանակվել են երկկողմ հարաբերությունները կարգավորելու մասին դրական ազդակներով, սակայն չնայած ՀՀ վարչապետ Նիկոլ Փաշինյանի և Թուրքիայի նախագահ Ռեջեփ Էրդողանի մի շարք հայտարարություններին՝ այդ ուղղությամբ գործնական քայլեր առայժմ չեն արվել:

Օգոստոսի 26-ին Թուրքիայի նախագահ Ռեջեփ Էրդողանը Թուրքիայում հավատարմագրված օտարերկրյա դեսպանների հետ հանդիպման ժամանակ ասել էր, թե Արցախյան վերջին պատերազմից հետո տարածաշրջանում խաղաղության և կայունության հաստատման ուղղությամբ առաջընթացի նոր հնարավորություններ են ստեղծվել, և եթե «Հայաստանը դրականորեն արձագանքի այդ հնարավորություններին», Թուրքիան էլ կանի անհրաժեշտ քայլեր, ինչից հետո Նիկոլ Փաշինյանը կառավարության նիստի ընթացքում արձանագրեց, որ «տարածաշրջանային խաղաղության առումով Թուրքիայի կողմից որոշակի դրական ազդակներ կան»: Վարչապետը հավելել էր, որ Երևանը այդ ազդակները կգնահատի և դրական ազդակներին դրական ազդակով կպատասխանի:

Սեպտեմբերի 19-ին Թուրքիայի նախագահ Էրդողանը հայտարարեց, որ Վրաստանի վարչապետը իրեն է փոխանցել հանդիպման վերաբերյալ Հայաստանի վարչապետ Նիկոլ Փաշինյանի առաջարկը, սակայն Հայաստանի վարչապետի խոսնակն ի պատասխան տեղեկացրեց, որ վարչապետի պատկերացմամբ՝ բարձր և բարձրագույն մակարդակի հանդիպումներին պետք է նախորդեն աշխատանքային քննարկումները:

Նոյեմբերի 20-ին հրապարակվեց ՀՀ արտաքին գործերի նախարարի՝ Փարիզ աշխատանքային այցի ընթացքում ֆրանսիական հեղինակավոր «Լը Ֆիգարո» (Le Figaro) օրաթերթին տված հարցազրույցը, որում Արարատ Միրզոյանը, պատասխանելով հարցին, թե պատրա՞ստ է արդյոք Հայաստանը կարգավորել Թուրքիայի հետ իր հարաբերությունները, ասել էր,որ Հայաստանը մշտապես հայտարարել է, որ պատրաստ է կարգավորել երկկողմ հարաբերությունները առանց նախապայմանների՝ չնայած Արցախի դեմ պատերազմի ընթացքում Թուրքիայի կողմից Ադրբեջանին ցուցաբերված հսկայական աջակցությանը: Նախարարը հավելել էր, որ Երևանը դրական ազդակներ է ստացել Թուրքիայից երկխոսությունը վերաբացելու ուղղությամբ, սակայն Անկարան նոր պայմաններ է առաջադրում հարաբերությունների կարգավորման համար, դրանց թվում Ադրբեջանը և Նախիջևանը կապող «միջանցքի» հարցն է, ինչը բացարձակապես չի կարող քննարկման առարկա լինել:

 

Արամ Սարգսյան

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]