Մրցակիցը մեզ տվեց անհրաժեշտ տարածություն. Տիմո Վերները մեկնաբանել է Հայաստանի հավաքականի նկատմամբ խոշոր հաշվով հաղթանակը
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Գերմանիայի ֆուտբոլի ազգային հավաքականի հարձակվող Տիմո Վերները մեկնաբանել է Հայաստանի հավաքականի նկատմամբ խոշոր հաշվով հաղթանակը: Ինչպես հաղորդում է «Արմենպրես»-ը, վկայակոչելով ՈՒԵՖԱ-ի մամուլի ծառայությունը, Տիմո Վերներն ընդգծել է, որ Հայաստանի հավաքականը խաղի ընթացքում իրենց տվել է անհրաժեշտ տարածություն: «Ես կարծում եմ, որ մենք լավ պրեսինգ էինք կիրառում գնդակը կորցնելիս, և կարծում եմ, որ սա էր խաղը շահելու բանալին: Լիխտենշտեյնի դեմ խաղն այնքան էլ հեշտ չէր գնդակի համար պայքարում հաղթելու և արագ խաղալու առումով: Այս անգամ մենք դա ավելի լավ արեցինք»,- ասել է Վերները՝ հավելելով, որ ցանկանում են նույն մակարդակով խաղալ նաև Իսլանդիայի դեմ առաջիկա հանդիպմանը:
Հայաստանի ֆուտբոլի ազգային հավաքականը սեպտեմբերի 5-ին մրցակցի հարկի տակ խոշոր հաշվով զիջեց Գերմանիայի հավաքականին: Աշխարհի առաջնության որակավորման փուլի շրջանակում կայացած խաղում Հայաստանի ազգային հավաքականը զիջեց 6:0 հաշվով: Հայաստանի հավաքականը այս պարտությունից հետո մնաց 10 միավորով եւ զբաղեցնում է J խմբի մրցաշարային աղյուսակի երկրորդ հորիզոնականը։ 12 միավորով աղյուսակը գլխավորում է Գերմանիայի հավաքականը։
Բաժանորդագրվեք մեր ալիքին Telegram-ում