Կասֆալտապատվի Ծովակ համայնքի 1-ին փողոցը
ԳԱՎԱՌ, 28 ՀՈՒԼԻՍԻ, ԱՐՄԵՆՊՐԵՍ։ Գեղարքունիքի մարզի Ծովակ համայնքում ՀՀ կառավարության կողմից իրականացվող սուբվենցիոն ծրագրի շրջանակներում ճանապարհի հիմնանորոգման աշխատանքներ կիրակակացվեն 1-ին փողոցում։ Ինչպես «Արմենպրես»-ին տեղեկացրին Գեղարքունիքի մարզպետարանի զարգացման ծրագրերի, վերլուծության եւ զբոսաշրջության բաժնից, Մարտունի-Վարդենիս մայրուղուց գյուղ մտնող ճանապարհը կասֆալտապատվի 906 գծամետր երկարությամբ եւ 4530 քառակուսի մետր ընդհանուր մակերեսով։
Ծրագիրը հաստատվել է Միջգերատեսչական հանձնաժողովի 2021 թվականի հունիսի 16-ի նիստում։Ծրագրի նախնական ընդհանուր արժեքը կազմում է 70 միլիոն 360 հազար դրամ, որի 40 տոկոսը կամ 28 միլիոն 144 հազար դրամը հատկացնում է ՀՀ կառավարությունը, 60 տոկոսը կամ 42 միլիոն 216 հազար դրամը՝ Ծովակի համայնքապետարանը։ «Հիմնանորոգվող փողոցը հատվում է Ծովակ-Լճավան-Մաքենիս –Ախպրաձոր միջհամայնքային նշանակության ճանապարհին, որի հիմնանորոգման աշխատանքներն այժմ ընթացքի մեջ են։ Շինարարական աշխատանքների մրցույթը կհայտարարվի առաջիկայում»,-ներկայացրին Ծովակի համայնքապետարանի աշխատակազմից։
Խոսրով Խլղաթյան
Բաժանորդագրվեք մեր ալիքին Telegram-ում