Առաջարկվում է պատվին պատճառված վնասի հատուցման գործերի քննության համար հստակ ժամկետ սահմանել
ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ: ՀՀ ազգային ժողովի անկախ պատգամավոր Գևորգ Պետրոսյանն առաջարկում է պատվին, արժանապատվությանը կամ գործարար համբավին պատճառված վնասի հատուցման վարույթով գործերի քննության համար հստակ ժամկետ սահմանել:
«Արմենպրես»-ի փոխանցմամբ` այս մասին օրենքի նախագիծը Պետրոսյանը ներկայացրեց ԱԺ պետական-իրավական հարցերի մշտական հանձնաժողովի նիստում:
«Անձի պատվի և արժանապատվության պաշտպանությունը պետք է իրականացվի խելամիտ ժամկետներում որպես այդ իրավունքների արդյունավետ պաշտպանության երաշխիք: Նախագծով առաջարկվում է պատվին, արժանապատվությանը կամ գործարար համբավին պատճառված վնասի հատուցման վարույթն ընդգրկել ՀՀ քաղաքացիական դատավարության օրենսգրքի «Հատուկ հայցային վարույթներ» ենթաբաժնում: Սահմանել հստակ ժամկետ նման վարույթով գործերի քննության համար, քանի որ նման գործերն իրենցից ապացուցողական բարդություն չեն ներկայացնում»,- ասաց Պետրոսյանը:
Նախագծով` Վերաքննիչ դատարանը եզրափակիչ դատական ակտի դեմ ներկայացված բողոքը պետք է քննի եւ որոշում կայացնի այն վարույթ ընդունելուց հետո՝ երկամսյա ժամկետում:
Արդարադատության նախարարի տեղակալ Վահե Դանիելյանը նշեց, որ գործադիրը կողմ է նախագծին եւ ներկայացրել է որոշակի առաջարկներ: Վճռաբեկ դատարանի կողմից վարույթ ընդունելու ժամկետն առաջարկվեց սահմանել մեկ ամիս: Փոխնախարարը փաստեց, որ դատարանների գերծանրաբեռնվածությունն է դատական նիստերի ձգձգման պատճառը:
«ՀՀ քաղաքացիական դատավարության օրենսգրքում լրացում կատարելու մասին» օրենքի նախագծին տրվեց դրական եզրակացություն:
Բաժանորդագրվեք մեր ալիքին Telegram-ում