ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: «ՎԵՏՕ» շարժման ղեկավար Նարեկ Մալյանը հայտնել է իրեն մեղադրանք առաջադրվելու մասին: Ինչպես տեղեկացնում է «Արմենպրես»-ը, Մալյանն այս մասին գրել է «Ֆեյսբուք»-ի իր էջում:

Նա նշել է, որ Քննչական կոմիտեի ծանր հանցագործությունների քննության բաժնում իրեն գրավոր բացատրել են, որ «մահ դավաճաններին» կոչը բռնության սպառնալիք է ՀՀ վարչապետ Նիկոլ Փաշինյանին և մեղադրանք առաջադրել ՀՀ քրեական օրենսգրքի 226.2 հոդվածով (ազգային, ռասայական կամ կրոնական թշնամանք հարուցելը):

Փետրվարի 26-ին Ազգային ժողովի դիմաց հրավիրված հանրահավաքի ընթացքում  տեղի է ունեցել «Չաուշեսկուի գնդակահարությունը կամ մահ դավաճաններին» ֆուտուրիստական ներկայացման ցուցադրությունը: Հայաստանի մարդու իրավունքների պաշտպան Արման Թաթոյանը դատապարտել է մահապատժի բեմականացված ցուցադրումը: 

ՀՀ քննչական կոմիտեից հայտնեցին, որ ՔԿ Երևան քաղաքի քննչական վարչության ծանր հանցագործությունների քննության բաժնում քննվող քրեական գործով Նարեկ Մալյանին մեղադրանք է առաջադրվել՝ ՀՀ քրեական օրենսգրքի 226.2-րդ հոդվածի 1-ին մասով: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին: