ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ:  Մանկական «Նոր ալիք» երգի միջազգային մրցույթում 2020-ին Հայաստանը ներկայացրել են արցախցի Անի Պետրոսյանն ու ռուսաստանաբնակ երգչուհի Էլեն Բադալյանը: Անին զբաղեցրել է 5-րդ հորիզոնականը, իսկ Էլենը՝ 3-րդ:

«Արմենպրես»-ի հաղորդմամբ՝ մրցույթի եզրափակիչ փուլը տեղի է ունեցել  հոկտեմբերի 8-ին Ղրիմում:

Մեզ հետ զրույցում Անի Պետրոսյանի պրոդյուսեր, «Արցախի ձայներ» երաժշտական նախագծի գեղարվեստական ղեկավար Լիրա Քոչարյանը նշեց, որ Անին հրաշալի ելույթ է ունեցել հոկտեմբերի 7-ին՝ կատարելով Dance Monkey երգը. հոկտեմբերի 8-ի ելույթը նույնպես հաջող է եղել: «Մենք մի քանի երգ էինք առաջարկել, սակայն մրցույթի պրոդյուսերները շատ հավանեցին Միշայի «Մամա» երգը, որն էլ մրցութային երկրորդ օրը կատարեց Անին»,-ասաց Քոչարյանը:

Նա ուրախալի համարեց այն փաստը, որ մրցույթում երրորդ տեղն է զբաղեցրել մոսկվայաբնակ Էլեն Բադալյանը:

Լիրա Քոչարյանի խոսքով՝ աշխարհի բոլոր երեխաները պետք է ստեղծագործեն, այլ ոչ թե պատսպարվեն թաքստոցներում կամ կասետային ռումբերի զոհ դառնան:

Մրցույթում առաջին հորիզոնականը զբաղեցրել է Ռուսաստանի ներկայացուցիչ Անաստասիա Իվանովան: